އެލީޓް ރަނާސް މޯލްޑިވްސްގެ އަހަރުގެ އެންމެ މޮޅު ފިރިހެން އެތުލީޓަކަށް މުޙައްމަދު ރަޝީދު އަދި އެންމެ މޮޅު އަންހެން ދުވުންތެރިއަކަށް މާޔަން މުޙައްމަދު ހޮވިއްޖެއެވެ.
މި ވަނަތައް ހޮވާފައިވަނީ އެލީޓް ރަނާސް މޯލްޑިވްސްއަށް 4 އަހަރުފުރުން ފާހަގަކުރުމުގެ ގޮތުން މޫކައި ހޮޓެލްސްގައި ބޭއްވި ރަސްމިއްޔާތުގައެވެ. މި ރަސްމިއްޔާތު ޝަރަފްވެރިކޮށްދެއްވީ އެސްޓީއޯގެ މެނޭޖިން ޑިރެކްޓަރ އަބްދުﷲ ސައީދެވެ.
މީގެއިތުރުން މި ރަސްމިއްޔާތުގައި މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) ގެ ޑެޕިއުޓީ މެނޭޖިން ޑިރެކްޓަރ އިބްރާހީމް ތޯހާ އާއި އެލީޓް ރަނާސްގެ ރައީސް އަހްމަދު ޝަރަފް އަދި ނައިބު ރައީސް ތޯހާ މުހައްމަދުގެ ބައިވެރިވަޑައިގެންނެވި އެވެ.
މި ރަސްމިއްޔާތުގައި ވަނީ އެލީޓް ރަނާސްއިން މި ވޭތުވެދިޔަ ހަތަރު އަހަރުދުވަހުގެ ތެރޭގައި ހޯދާފައިވާ ކާމިޔާބީތައް ފާހަގަކޮށް އެކަމުގެ އަގުވަޒަންކޮށްފައެވެ. މީގެތެރޭގައި ބައިނަލްއަޤްވާމީ ދުވުންތަކާއި ރާއްޖޭގައި ބޭއްވި ދުވުންތަކުގައި ހޯދި ކާމިޔާބީތައް ފާހަގަކޮށްފައިވެއެވެ. އަދި ސްޕޮންސަރުންނާއި އެކި ގޮތްގޮތުން އެލީޓް ރަނާސްއަށް އެހީތެރިވެދިން ފަރާތްތަކުގެ އަގުވަޒަންކޮށްފައިވެއެވެ.
ހަތަރު އަހަރުފުރުން ފާހަގަކޮށް ވާހަކަދައްކަވަމުން އެލީޓް ރަނާސްގެ ރައީސް ތޯހާ ވިދާޅުވީ ކުރިޔަށްއޮތް ތަނުގައި އެންމެ ބޮޑަށް އަމާޒުހިފާނީ ބައިނަލްއަޤްވާމީ ދުވުންތަކުން އެލީޓް ރަނާޒްގެ ދުވުންތެރިންނަށް ފުރުސަތު ހޯދައިދިނުމަށް ކަމަށެވެ. އަދި އެކަމަށްޓަކާ މަސައްކަތް ފަށާފައިވާކަމަށް ވެސް ވިދާޅުވިއެވެ.
ދިގު ދުވުންތަކަށް ހާއްސަކޮށް އެލީޓް ރަނާސް މޯލްޑިވްސް އުފެދިފައިވަނީ 2019 ވަނަ އަހަރުގައެވެ. އެ ކުލަބުން ދަނީ ރާއްޖޭގެ ބޮޑެތި ދުވުންތަކުގައި ވާދަކޮށް ރަނގަޅު ކާމިޔާބީތަކެއް ހޯދަމުންނެވެ.