ދިވެހިރާއްޖޭގެ ޤައުމީ ޔުނިވާސިޓީގެ ދަރިވަރުންގެ ޔޫނިއަން (އެމްއެންޔޫއެސްޔޫ) އިން އިންތިޒާމުކޮށްގެން ބާއްވާ ފުޓްސަލް ފިއެސްޓާ ފަށައިފިއެވެ.
ހުޅުމާލޭގައި ފެށި މި މުބާރާތް ޝަރަފްވެރިކޮށްދެއްވީ ރައީސުލްޖުމްހޫރިއްޔާގެ ނައިބު ފައިސަލް ނަސީމެވެ. މީގެއިތުރުން މި މުބާރާތް ހުޅުވުމުގެ ރަސްމިއްޔާތުގައި އެމްއެންޔޫގެ ވައިސް ޗާންސެލަރ ޑރ. މުހައްމަދު ޝަރީފާއި ކޮލެޖުތަކުގެ އިސްވެރިން ބައިވެރިވެވަޑައިގެންނެވި އެވެ.
އަންނަ މަހުގެ 6 ވަނަ ދުވަހުގެ ނިޔަލަށް ކުރިޔަށްދާ މި މުބާރާތަކީ އެމްއެންޔޫއެސްޔޫ އިން އިސްނަގައިގެން ރާއްޖޭގެ ކޮލެޖު/ޔުނިވާސިޓީތަކަށް ޚާއްސަކޮށްގެން ބާއްވަމުން އަންނަ މުބާރާތެކެވެ. ދެ ޑިވިޝަނަކަށް ބަހާލައިގެން ކުރިޔަށްދާ މި މުބާރާތުގައި މިއަހަރު ޖުމްލަ 31 ޓީމު ވާދަކުރެއެވެ. އެއީ ފިރިހެން ޑިވިޝަންގެ 18 ޓީމާއި، އަންހެން ޑިވިޝަންގެ 13 ޓީމެވެ.
މުބާރާތުގެ ގްރޫޕް ސްޓޭޖުގެ މެޗުތަކަށްފަހު ކުއާޓާ ފައިނަލްގެ މެޗުތައް ފެށުމަށް ހަމަޖެހިފައި ވަނީ އޮކްޓޫބަރު މަހުގެ ދެވަނަ ދުވަހުއެވެ. އެއަށްފަހު ދެ ޑިވިޝަންގެ ވެސް ސެމީ ފައިނަލް މެޗުތައް އޮކްޓޫބަރު މަހުގެ ހަތަރު ވަނަ ދުވަހު ކުޅުމަށްފަހު ފައިނަލް މެޗުތައް ކުރިއަށްދާނީ އޮކްޓޫބަރު މަހުގެ ހަވަނަ ދުވަހު އެވެ.
މުބާރާތް ހުޅުވުމުގެ ރަސްމިއްޔާތުގައި ވާހަކަފުޅުދައްކަވަމުން ނައިބު ރައީސް ފައިސަލް ނަސީމް ވަނީ ކޮންމެ ކުއްޖަކީވެސް ކާމިިޔާބު ކުއްޖަކަށް ވުމަށް މަސައްކަތްކުރުމަށް އެދިވަޑައިގެންފައެވެ. އަދި ޤައުމަށް ފައިދާހުރި މަސައްކަތްތަކެއް ކުރުމަށްވެސް ނައިބު ރައީސް ވަނީ މުބާރާތުގެ ބައިވެރިންގެ ކިބައިން އެދިވަޑައިގެންފައެވެ.
މި މުބާރާތް އެންމެ ފުރަތަމަ ބާއްވާފައިވަނީ 2013 ގައެވެ. ފިރިހެން ޑިވިޝަނަށް އަމާޒުކޮށް މި މުބާރާތް ފުރަތަމަ ބޭއްވި ނަމަވެސް 2018 ވަނަ އަހަރު ވަނީ އަންހެން ޑިވިޝަން ބައިވެރިކުރަން ފަށާފައެވެ. އޭގެފަހުން ކާމިޔާބު މުބާރާތްތަކެއް ބޭއްވުމަށްފަހު ކޮވިޑުގެ ހާލަތާއި ގުޅިގެން ދެ އަހަރުގެ މެދުކެނޑުމަކަށްފަހު މުބާރާތް ދެން ބޭއްވީ 2022 ގައެވެ.
މުބާރާތުގެ އެންމެފަހުގެ ފިރިހެން ޑިވިޝަނުގެ ޗެމްޕިއަން ޓީމަކީ މެޕްސް ކޮލެޖެވެ. އަދި އަންހެން ޑިވިޝަނުގެ ޗެމްޕިއަންކަން ހޯދާފައިވަނީ އެމްއެންޔޫ ބިޒްނަސް ސްކޫލެވެ.