ޕީޕީއެމާއެކު އެއްބަސްވުމަކަށް ނާދެވުނު، ޑިމޮކްރެޓުން މިހާރު މަޝްވަރާކުރަނީ އެމްޑީޕީއާ އެކަނި

ރިޔާސީ އިންތިޚާބުގެ ދެވަނަ ބުރުގައި އެކުގައި މަސައްކަތްކުރުމާ ގުޅޭ މަޝްވަރާތައް މިހާރު ކުރިއަށް ދަނީ ހަމައެކަނި އެމްޑީޕީ އާއިއެކަމަށާއި، ޕީޕީއެމް އާއިއެކު ކުރަމުންދިޔަ މަޝްވަރާތައް މިހާރު ހުއްޓިފައިވާކަމަށް، ދަ ޑިމޮކްރެޓްސް އިން ބުނެފިއެވެ.

ރިޔާސީ އިންތިޚާބުގެ ފުރަތަމަ ބުރު، 50 އިންސައްތައަށްވުރެ މަތިން ހޯދާ އެއްވެސް ކެންޑިޑޭޓަކަށް، އިންތިޚާބު އެއްބުރުން ކާމިޔާބުކުރެވިފައި ނެތުމުން ވަނީ އިންތިޚާބުގެ ދެވަނަ ބުރެއް ބާއްވަން ޖެހިފައެވެ. އެގޮތުން ދެވަނަ ބުރުގައި ވާދަކުރައްވަނީ ފުރަތަމަ ބުރުން އެންމެ ގިނަ ވޯޓު ހޯއްދެވި ދެ ކެންޑިޑޭޓުންކަމަށްވާ އިދިކޮޅު ޕީއެންސީގެ ރިޔާސީ ކެންޑިޑޭޓް ޑރ.މުޙައްމަދު މުޢިއްޒާއި، މިހާރުގެ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙެވެ. އެހެންކަމުން އިންތިޚާބުގެ ދެވަނަ ބުރު ކާމިޔާބުކުރުމަށް ދެ ކެންޑިޑޭޓުންވެސް ގެންދަވަނީ އިންތިޚާބުގެ ފުރަތަމަ ބުރުގައި ނާކާމިޔާބުވި ސިޔާސީ ޕާޓީތަކާއި ކެންޑިޑޭޓުންނާއި މަޝްވަރާކޮށް ކޯލިޝަން ހެދުމަށް މަސައްކަތްކުރަމުންނެވެ. އިންތިޚާބުގެ ފުރަތަމަ ބުރުން ތިންވަނައަށް އެންމެ ގިނަ ވޯޓު ހޯއްދެވީ ދަ ޑިމޮކްރެޓްސްއިންނެވެ.

ދަ ޑިމޮކްރެޓްސްއިން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން އެ ޕާޓީގެ ވަގުތީ ޗެއަރޕާސަން ޙަސަން ލަޠީފް ވިދާޅުވީ އެމްޑީޕީ އަދި ޕީޕީއެމް/ޕީއެންސީޢާއެކުވެސް މަޝްވަރާތައް ކުރިއަށް ގެންދިޔަކަމަށެވެ. އެގޮތުން ޕީޕީއެމާއެކު ކުރެވުނު މަޝްވަރާތަކުގައި އެއްވެސް އެއްބަސްވުމަކަށް އާދެވިފައިނުވާކަމަށާއި، އެހެންކަމުން އެއްވެސް އެއްބަސްވުމެއްގައިވެސް ސޮއިކޮށްފައިނުވާކަމަށް ޙަސަން ވިދާޅުވިއެވެ.

ދަ ޑިމޮކްރެޓްސްގެ ހުށައެޅުމަކީ ނިޒާމީ ވޯޓެއްނެގުމެވެ.

ޙަސަން ވިދާޅުވީ، ނިޒާމީ ވޯޓެއް ނެގުމަށް އެއްބަސްނުވާނަމަ އެކުގައި މަސައްކަތްކުރުމަށް ދަތިވާނެކަމަށެވެ. އޭނާ ވަނީ ޕީޕީއެމާއެކު ކުރައްވާ މަޝްވަރާތަކުގައި އެޕާޓީން ސީރިއަސްކަމެއްގެ ގޮތުގައި ނުދެކޭކަން ހާމަވާކަމަށް ވިދާޅުވެފައެވެ.

"ޕީޕީއެމް އާއިއެކީގައި ކުރެވުނު މަޝްވަރާތަކުގައި، އަޅުގަނޑުމެންނަށް ފާހަގަ ކުރެވުނީ ޕީޕީއެމަށް ވަރަށް ދަތިކަމަށް، އަދި އެ ބޭފުޅުން ބޭނުންފުޅު ނުވާކަމަށް، އެއްވެސް ލިޔުމެއްގައި ސޮއި ކޮށްގެން އަޅުގަނޑުމެންނާއި އެކީގައި މަސައްކަތެއް ކުރުމަށް. އޭގެ މާނައަކީ އަޅުގަނޑުމެން ދެ ފަރާތުގެ މެދުގައި ދެކެވޭ ވާހަކަތަކުގައިވެސް، އަދި ނިންމާ ނިންމުންތަކުގައިވެސް، ދެ ފަރާތުގެ މެދުގައި ސޮއި ކޮށްގެއް މަސައްކަތެއް ކުރުމަކަށް ޕީޕީއެމްއަކުން އެއްބަހެއް ނުވޭ. އެހެންވީމަ އަޅުގަނޑުމެން ވަރަށް ދަތި ޕީޕީއެމް އާއިއެކީގައި އެއްވެސް އެއްޗެއްގައި ސޮއެ ނުކޮށް ޑިމޮކްރެޓުންނަށް މަސައްކަތެއް ކުރަން." ޙަސަން ލަޠީފް ވިދާޅުވިއެވެ.

ދަ ޑިމޮކްރެޓްސްއިން ދަނީ އެމްޑީޕީއާއެކުވެސް މަޝްވަރާކުރަމުންނެވެ. އެމްޑީޕީއާއެކު ކުރާ މަޝްވަރާތަކުގައިވެސް ދަ ޑިމޮކްރެޓްސްގެ ފަރާތުން ހުށަހަޅާ ހުށަހެޅުމަކީ މިއަހަރުގައި ބާއްވާ ރިޔާސީ އިންތިޚާބުގެ ދެވަނަ ބުރުގެ ވޯޓުލުމުގެ ކުރިން، 25 ސެޕްޓެމްބަރުގައި ނިޒާމީ ވޯޓެއް ނެގުމެވެ. އެއީ ދިވެހިރާއްޖޭގައި އޮންނަން ރައްޔިތުން ބޭނުންވަނީ ރިޔާސީ ނިޒާމެއްތޯ ނުވަތަ ބަރުލަމާނީ ނިޒާމެއްތޯ ބެލުމަށް ފެންނަ ނުފެންނަ ވޯޓެއް ނެގުމެވެ.

ޑިމޮކްރެޓްސްއިން ޤަބޫލުކުރާ ގޮތުގައި ފެންނަ ނުފެންނަ ވޯޓެއް ނެގުމުގެ ބާރު ޤާނޫނު އަސާސީއިން ރައީސުލްޖުމްހޫރިއްޔާއަށް ލިބިދީފައިވެއެވެ. އެހެން ނޫންނަމަ، ޤާނޫނަށް ބަދަލު ގެނެސްގެންވެސް އެ ކަން އެގޮތަށް ކުރުމުގެ ފުރުޞަތު އެމްޑީޕީއަށް އެބައޮތެވެ. ސަބަބަކީ އެމްޑީޕީއަށް ރައްޔިތުންގެ މަޖިލީހުގެ މެޖޯރިޓީ ލިބިފައިވުމެވެ. އެހެންނަމަވެސް، އެމްޑީޕީން، ޑިމޮކްރެޓްސްގެ އެ ހުށަހެޅުމާއިމެދު ވަކިގޮތެއް އަދި ނިންމަވާފައި ނުވާކަމަށް ޙަސަން ލަޠީފް ވަނީ ވިދާޅުވެފައެވެ.

ރިޔާސީ އިންތިޚާބުގެ ދެވަނަ ބުރު ކާމިޔާބުކުރުމަށް ދެ ކެންޑިޑޭޓުންނަށްވެސް ދަ ޑިމޮކްރެޓްސްއާއ ގުޅުން މުހިންމެވެ. އެއީ ޑިމޮކްރެޓްސްގެ ރިޔާސީ ކެންޑިޑޭޓަށް އިންތިޚާބުގެ 15ހާހަށްވުރެ ގިނަ ވޯޓާއެކު ތިންވަނަ ލިބުމެވެ. އެއީ އިންތިޚާބުގެ 7.18 އިންސައްތަ ވޯޓެވެ.