ކްރިކެޓް ބޯޑް އޮފް މޯލްޑިވްސް (ސީބީއެމް) އިން އިންތިޒާމުކޮށްގެން ކުރިއަށްގެންދިޔަ މޯލްޑިވްސް ޓީ20 ޗެމްޕިއަންޝިޕް ސީބީއެލް ސްޕޯޓްސްއިން ކާމިޔާބުކޮށްފިއެވެ.
ސީބީއެލްއިން ޗެމްޕިއަންކަން ހޯދީ މިއަދު ކުޅުނު ފައިނަލް މެޗުގައި ކަސްޓަމް ރެކްރިއޭޝަން ކުލަބާއި ބައްދަލުކޮށް ހަ ވިކެޓުން މޮޅުވެގެންނެވެ.
މި މެޗުގެ ގުރު ދިމާވުމުން ކަސްޓަމްސް އެންމެ ފުރަތަމަ ކުޅެން އަރައި 20 އޯވަރު ހަމަވިއިރު ހަތް ކުޅުންތެރިން ނުބައިވެގެން ހެދުނީ 85 ލަނޑެވެ. އެ ޓީމުން އެންމެ ރަނގަޅަށް ކުޅުނީ 21 ބޯޅައިން 18 ލަނޑު ހެދި ހާޒިގް ހަސަން ރަޝީދާއި 32 ބޯޅައިން 18 ލަނޑު އެއްކުރި ޝިއުސް ފަރީދެވެ. އަދި ޔޫސުފް އަޒިޔާން ވަނީ 17 ބޯޅައިން 15 ލަނޑު ހަދާފައެވެ.
ޖަވާބުގައި ސީބިއެލް ކުޅެން އަރައި ވަނީ 13 ވަނަ އޯވަރުގައި ހަތަރު ކުޅުންތެރިން ނުބައިވެގެން 86 ލަނޑު ހަދައި މެޗު ކާމިޔާބުކޮށްފައެވެ. އެ ޓީމުން އެންމެ ރަނގަޅަށް ކުޅުނީ 30 ބޯޅައިން 32 ލަނޑު ހެދި އިރާންދަ ބަންޑާރަ އާއި ނުބައިނުވެ 21 ބޯޅައިން 18 ލަނޑު އެއްކުރި މުޙައްމަދު ފައުޒާނެވެ.
ފައިނަލް މެޗުގެ ކުރިން މިއަދު ކުޅެވުނު މުބާރާތުގެ 10 ވަނަ މެޗުގައި ކޮމެޓްސް ކްރިކެޓް ކުލަބާއި ބައްދަލުކޮށް ނުވަ ވިކެޓުން މެޗު ކާމިޔާބުކުރީ ފުވައްމުލަކު ކްރިކެޓް އެކެޑަމީއެވެ.
މި މެޗުގެ ގުރުދިމާވުމުން ކޮމެޓްސް އެންމެ ފުރަތަމަ ކުޅެން އަރައި 20 އޯވަރު ހަމަވިއިރު ހަތަރު ކުޅުންތެރިން ނުބައިވެގެން ހެދުނީ 110 ލަނޑެވެ. އެ ޓީމުން އެންމެ ރަނގަޅަށް ކުޅުނީ 31 ބޯޅައިން 37 ލަނޑު ހެދި ކެޕްޓަން އިބްރާހީމް ސަދޫފް އާއި 37 ބޯޅައިން 28 ލަނޑު އެއްކުރި ހުސެއިން މަފާޒެވެ.
ޖަވާބުގައި ފުވައްމުލަކު ކްރިކެޓް އެކެޑަމީ ކުޅެން އަރައި ވަނީ 13 ވަނަ އޯވަރުގައި އެންމެ ކުޅުންތެރިއަކު ނުބައިވެގެން 111 ލަނޑު ހަދައި މެޗު ކާމިޔާބުކޮށްފައެވެ. އެ ޓީމުން އެންމެ ރަނގަޅަށް ކުޅެފައިވަނީ ނުބައިނުވެ 28 ބޯޅައިން 54 ލަނޑު ހެދި ކަސުން އާއި ނުބައިނުވެ 43 ބޯޅައިން 52 ލަނޑު އެއްކުރި ސަޗިންއެވެ.
މި މުބާރާތުގެ އެންމެ މޮޅު ކުޅުންތެރިއަކަށް ހޮވުނީ ކަސްޓަމްސްގެ ޔޫސުފް އަޒިޔާނެވެ. އަދި އެންމެ މޮޅު ހޮވުންތެރިއަކަށް ސީބީއެލްގެ އިރާންދަ ހޮވުނުއިރު، އެންމެ މޮޅު އުކުންތެރިއަކަށް ހޮވުނީ ކަސްޓަމްސްގެ ރައްސާމް ރަޝީދެވެ. އަދި ހުރިހާ ގޮތަކުން އެންމެ މޮޅު ކުޅުންތެރިއަކަށް ފުވައްމުލަކު އެކެޑަމީގެ ކަސުން ހޮވުނުއިރު، އެންމެ އުއްމީދީ ކުޅުންތެރިއަކަށް ހޮވިފައިވަނީ އައިޒީ ސްޕޯޓްސްގެ ރައްޔާނެވެ.