ޔޫރޯ 2024 ގެ ކޮލިފައިން ގްރޫޕް ބީގައި ރޭ ކުޅުނު މެޗުގައި ގްރީސް އަތުން ނެދަލަންޑްސް މުހިންމު މޮޅެއް ހޯދައިފިއެވެ.
އަމިއްލަ ޤައުމުގައި ކުޅުނު މެޗުން ނެދަލަންޑްސް މޮޅުވީ ފަސޭހަކަމާއެކު 3-0 ގެ ނަތީޖާއަކުންނެވެ.
މި މެޗުގައި ނެދަލަންޑްސްއިން ތިން ލަނޑުވެސް ކާމިޔާބުކޮށްފައިވަނީ ފުރަތަމަ ހާފުގައެވެ. އެގޮތުން މެޗުގެ 17 ވަނަ މިނެޓުގައި ނެދަލަންޑްސްއަށް ލީޑު ނަގައިދިނީ މާޓެން ޑެ ރޫންއެވެ. މި އޭނާ ނެދަލަންޑްސްއަށް ކާމިޔާބުކޮށްދިން ފުރަތަމަ ލަނޑެވެ.
އޭގެ ފަހުން މެޗުގެ 31 ވަނަ މިނެޓުގައި ޑެންޒެލް ޑަމްފްރީސް ނަގައިދިން ހުރަހަކުން ނެދަލަންޑްސްގެ ދެވަނަ ލަނޑު ޖަހައިދިނީ ލިވަޕޫލަށް ކުޅެމުން އަންނަ ފޯވާޑް ކޯޑީ ގަކްޕޯއެވެ. އަދި އޭގެ އަށް މިނެޓު ފަހުން ޑަމްފްރީސް ދިން އިތުރު ބޯޅައަކުން ވޯޓް ވެގޯސްޓް ވަނީ ނެދަލަންޑްސްގެ ތިންވަނަ ލަނޑު ޖަހައިދީފައެވެ.
މި މޮޅާއެކު ގްރޫޕް ބީގެ ދެވަނައިގައި އޮތް ނެދަލަންޑްސްއަށް ކުޅުނު ތިން މެޗުން ވަނީ ހަ ޕޮއިންޓް ލިބިފައެވެ. އަދި ތިންވަނައިގައި އޮތް ގްރީސްއަށްވެސް ހަ ޕޮއިންޓް ލިބިފައިވާއިރު، އެ ޤައުމުން ވަނީ ނެދަލަންޑްސްއަށްވުރެ އެއް މެޗު އިތުރަށް ކުޅެފައެވެ.