މާލެއިން ބ. އަތޮޅަށް ދަތުރުކުރި ދޯންޏެއް އަޑިއަށް ހިނގައްޖެ

މާލެއިން ފުރައިގެން ބ. އަތޮޅަށް ދަތުރުކުރި ދޯންޏެއް އަޑިއަށް ހިނގައްޖެއެވެ.

ފުލުހުން ވިދާޅުވީ، ބ.އަތޮޅަށް ދަތުރުކުރަމުންދިޔަ މުދާ އުފުލާ ދޯންޏެއް ދަރަވަންދޫއާއި ދިމާ ބޭރުން އަޑިއަށްދާކަމުގެ މައުލޫމާތު މިއަދު ހެނދުނު 10:40 ހާއިރު ފުލުހުންނަށް ލިބިފައިވާ ކަމަށެވެ. މި މައުލޫމާތު ފުލުހުންނަށް ލިބުމާއިއެކު އެސަރަހައްދުގައި ފުލުހުން ދަނީ ހަރަކާތްތެރިވަމުންދާ ކަމަށެވެ.

މިދޯނިން ދަތުރުކުރީ 13 މީހުންނެވެ. އެއީ ދިވެއްސަކާއި، 12 ބިދޭސީންނެވެ. މިއެންމެންވެސް ފުލުހުންގެ އެހީތެރިކަމާއެކު ބ.އޭދަފުއްޓަށް ގެންގޮސްފައިވާ ކަމަށާއި، އެންމެންގެ ހާލުވެސް ރަނގަޅުކަމަށް ފުލުހުން މަޢުލޫމާތުދެއްވައެވެ.

މި ދުވަސްވަރަކީ ރާއްޖޭގެ އެކި ސަރަހައްދުތަކަށް މޫސުން ގޯސް ދުވަސްވަރެކެވެ. އެހެންކަމުން ކަނޑުދަތުރުފަތުރު ކުރައްވާ ފަރާތްތަކުން މޫސުމަށް ސަމާލުވުމަށް މޫސުމާއި ބެހޭ ޤައުމީ އިދާރާއިންވެސް އިލްތިމާސްކުރައްވައެވެ. އަދި ކުރިއަށްއޮތް 5 ދުވަހުވެސް ރާއްޖޭގެ އެކި ހިސާބުތަކަށް މޫސުން ގޯސްވާނެކަމަށް އެ އިދާރާއިން ވަނީ ލަފަކޮށްފައެވެ.