އޭޝިއާގެ 23 އަހަރުން ދަށުގެ ކޮލިފައިން މުބާރާތަށް ޤައުމީ ފުޓްބޯޅަ ޓީމަށް ނުދެވުނު މައްސަލައިގެ ޒިންމާ ސަރުކާރުން ނަގަން ނުޖެހޭނެ ކަމަށް ކުޅިވަރާ ބެހޭ ވުޒާރާއިން ބުނެފިއެވެ.
ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ޖެނެރަލް ސެކްރެޓަރީ ހުސެއިން ޖަވާޒް އިއްޔެ ވިދާޅުވީ ބޭރުގެ މުބާރާތްތަކަށް ދިއުމަށް، ސްޕޯޓްސް މިނިސްޓްރީން ޓިކެޓް ދޭނެ ކަމަށް ބުނުމުން، ތިން މުބާރާތަށް ދާ ރާއްޖޭގެ ތިން ޓީމުގެ ޓިކެޓް ކޯޓޭޝަން ވެސް މިނިސްޓްރީ އަށް މިދިޔަ މަހު 7 ގައި ހިއްސާ ކުރި ކަމަށެވެ.
އެ މިނިސްޓްރީން އިއްޔެ މީޑީއާ އަށް ފޮނުވި ސްޓޭޓެމެންޓްގައި ބުނީ މިއަހަރު ބައިވެރިވާން ޖެހޭ ބޭރުގެ ހުރިހާ މުބާރާތެއްގެ ތަފްސީލު މިދިޔަ އަހަރު ފޮނުވަން ހުރިހާ އެސޯސިއޭޝަނަކަށް އެންގި ކަމަށެވެ. ޒުވާން ތިން ޓީމުގެ ދަތުރު އެ މުއްދަތުގައި އެފްއޭއެމުން އަންގާފައި ނުވާކަމަށް މިނިސްޓްރީގެ އޮފިޝަލް ބުންޏެވެ. ފައިސާގެ މައްސަލަތަކާ ހުރެ އެފްއޭއެމް އޮތީ އަނދަވަޅަކަށް ވެއްޓިފަ އެވެ. ޑޮލަރު މާރު ކުރުމުގެ ނަމުގައި، އެލް މޯބައިލްގެ މައި ކުންފުނި އެކް މޯލްޑިވްސްއިން ނެގި ތިން މިލިއަން ރުފިޔާގެ ލޯނަކަށް ފައިސާ ދައްކާފައި ނުވާތީ، އެ ފައިސާ މި އަންނަ އާދިއްތަ ދުވަހު ދޭއް ޖެހުމުގެ ކުރިން ސިވިލް ކޯޓަށް ދެއްކުމަށް އެ އެސޯސިއޭޝަންގެ މައްޗަށް ސިވިލް ކޯޓުން ވަނީ ހުކުމްކޮށްފަ އެވެ. ބޫޓާންގައި މިހާރު ކުރިއަށްދާ 16 އަހަރުންދަށުގެ ސާފް ޗެމްޕިއަންޝިޕަށް ވެސް ރާއްޖޭގެ ޓީމަށް ފުރުނީ އުނދަގޫ ހާލަތެއްގެ ތެރެއިންނެވެ. މިދިޔަ ބުރާސްފަތި ދުވަހު ހަވީރު ޖޫނިއާ ޓީމު ފުރަން ދިޔަ ފަހުން ނުފުރޭނެކަން އެންގި އެވެ.
ސަރުކާރާ ގާތް މީހަކު މެދުވެރިކޮށް ލިބުނު ފައިސާ އަށް އެ ރޭ ފަތިހު ޓިކެޓް ހަމަޖެހުމުން ޓީމުން ފުރީ ހުކުރުދުވަހު މެންދުރު ކުރީގެ ވަގުތެއްގަ އެވެ. މި މަހު ނޭޕާލްގައި ބާއްވާ 19 އަހަރުންދަށުގެ ސާފް ޗެމްޕިއަންޝިޕަށް ވެސް ރާއްޖެ އަށް ޓީމަށް ދެވޭނެ ކަމާ މެދު ވެސް ވަނީ ސުވާލު އުފެދިފަ އެވެ. ޗައިނާގައި އިއްޔެ ފަށާ ރާއްޖެ ހިމެނޭ ގުރޫޕްގެ ކޮލިފިކޭޝަންގައި ވާދަކުރަން ޗައިނާ އަށް ދާން ތައްޔާރުވި ނަމަވެސް، ޓިކެޓް ގަނެވޭ ގޮތް ނުވުމުން ދިވެހި ޓީމަށް އެ މުބާރާތަށް ނުފުރުނެވެ. މިހާރު އެފްއޭއެމުން ވަނީ ކޮލިފައިންއިން ވަކިވެފަ އެވެ.