ފީފާ ވޯލްޑް ކަޕް އަދި އޭއެފްސީ އޭޝިއަން ކަޕުގެ ޖޮއިންޓް ކޮލިފައިންގައި އަންނަ މަހު ރާއްޖެއާ ދެކޮޅަށް ކުޅެން ޖެހޭ މެޗަށް ތައްޔާރުވުމުގެ ގޮތުން ބަންގްލަދޭޝްއިން އަފްޣާނިސްތާނާ ދެކޮޅަށް އެކުވެރިކަމުގެ މެޗެއް ކުޅެފިއެވެ.
މި މެޗު ނިމުނީ އެއްވެސް ޓީމަކަށް ލަނޑެއް ނުޖެހި 0-0 އިން އެއްވަރުވެގެންނެވެ. މެޗު އެއްވަރުވެގެން ނިމުނު އިރު ބަންގަލަދޭޝް ވަނީ މިހާރު ރާއްޖެއާ ދެކޮޅަށް ކުޅޭ ދެމެޗަށް ތައްޔާރުވުން ފަށާފައެވެ.
ރާއްޖެ އާއި ބަންގްލަދޭޝް ވޯލްޑް ކަޕް ކޮލިފައިންގައި ވާދަކުރާއިރު، މިއަހަރުގެ ޖޫން މަހު ނިމުނު ސާފް ޗެމްޕިއަންޝިޕްގައި ރާއްޖެ ވަނީ ބަންގްލަދޭޝް އަތުން ބަލިވެފަ އެވެ. މިއީ މިދިޔަ 20 އަހަރުގެ ތެރޭގައި ރާއްޖެ ބަންގަލްދޭޝް އަތުން ސާފް ޗެމްޕިއަންޝިޕްގައި ބަލިވި ފުރަތަމަ ފަހަރެވެ.
ބަންގްލަދޭޝްގެ ގައުމީ ޓީމުގެ ކޯޗު ހާވިއޭ ކަބްރޭރާ ވަނީ ރާއްޖެ ބަލިކުރެވޭނެކަމަށް ބުނެފައެވެ. ވޯލްޑް ކަޕް ކޮލިފައިންއަށް ގައުމީ ޓީމުން ރަސްމީކޮށް ފަރިތަކުރުންތައް ފަށާނީ އޭއެފްސީ ކަޕްގައި ސެޕްޓެމްބަރު މަހު 19 ވަނަ ދުވަހު މާޒިޔާއިން ކުޅޭ މެޗަށް ފަހުގަ އެވެ. ނަމަވެސް އޭގެ ކުރިން މާޒިޔާ ޓީމްގައި ހިމެނޭ ގައުމީ ޓީމްގެ ކުޅުންތެރިން ފިޔަވައި، ބާކީ ތިބި ކުޅުންތެރިން 19 އަހަރުން ދަށުގެ ގައުމީ ޓީމާއިއެކު ފަރިތަކުރާނެކަމަށް އެފްއޭއެމުން މައުލޫމާތުދެ އެވެ.
ވޯލްޑް ކަޕް ކޮލިފައިންގެ އޭޝިއާ ސަރަހައްދުގެ ފުރަތަމަ ބުރުގައި ރާއްޖެ އާއި ބަންގަލްދޭޝް ކުޅޭ ފުރަތަމަ މެޗު އޮންނާނީ އޮކްޓޫބަރު 12 ވަނަ ދުވަހު ގަލޮޅު ދަނޑުގަ އެވެ. ދެ ވަނަ މެޗު އޭގެ ހަފްތާއެއް ފަހުން އޮންނާނީ ބަންގަލްދޭޝްގަ އެވެ.