ބޫޓާންގައި މިހާރު ކުރިއަށްދާ 16 އަހަރުން ދަށުން ސާފް ޗެމްޕިއަންޝިޕް ފުޓްބޯޅަ މުބާރާތުގައި ރާއްޖޭގެ ޒުވާން ޓީމުން ކުޅުނު ފުރަތަމަ މެޗުން ބަލިވެ، ޕާކިސްތާން ސެމީ ފައިނަލުން ޖާގަ ހޯދައިފިއެވެ.
ޕާކިސްތާން ސެމީ ފައިނަލުން ޖާގަ ހޯދީ 3-0ން ރާއްޖެ ބަލިކޮށް، ގުރޫޕު ބީގެ އެއްވަަނަ ޓީމުގެ ގޮތުގައެވެ. މީގެ ކުރިން ޕާކިސްތާނުން ވަނީ ބޫޓާނާ ވާދަކޮށް، 2-1ން މޮޅުވެފައެވެ. މެޗުގެ 14 ވަނަ މިނެޓުގައި ޕާކިސްތާނުގެ ސުބްހާން ކަރީމް ވަނީ ލަނޑެއް ޖަހައި އެ ޓީމަށް ކުރިހޯދާފައެވެ.
އޭގެފަހުން މެޗުގެ 39 ވަނަ މިނެޓުގައި ޕާކިސްތާނަށް ލީޑު ފުޅާކޮށްދިނީ އަބްދުލް ސަމަދެވެ. ދެވަނަ ހާފު ފެށިގެން ހަވަނަ މިނެޓުގައި ޕާކިސްތާނުގެ މަޖީދު އަލީ ފޮނުވާލި ބޯޅަ ގޯލުގެ ތެރެއަށް ވަނީ ރާއްޖޭގެ އަހުމަދު މިފްޒާލްގެ ފައިގައި ޖެހިފައެވެ.
މި މެޗުގައި ރާއްޖޭގެ 16 އަހަރުން ދަށުގެ ޓީމުގައި ވަނީ މިވަތު ދިވެހި ޕްރިމިއަރ ލީގުގައި ކުޅެމުން އަންނަ ކުޅުންތެރިންނަށް ފުރުސަތު ދީފައެވެ. މިއަހަރުގެ މުބާރާތުގައި ގުރޫޕު އޭގައި ހިމެނެނީ ބަންގްލަދޭޝް، އިންޑިއާ އަދި ނޭޕާލެވެ.
ގުރޫޕު ބީގައި ހިމެނެނީ ރާއްޖެއާއި ޕާކިސްތާނުގެ އިތުރުން މުބާރާތް ބާއްވާ ގައުމު، ބޫޓާނެވެ. ރާއްޖެއާއި ބޫޓާން ބައްދަލުކުރާ މެޗު ކުޅުމަށް ހަމަޖެހިފައިވަނީ ބުދަ ދުވަހުއެވެ. މެޗުން މޮޅުވެގެން ސެމީއަށް ދިއުމުގެ ފުރުސަތު ގައުމީ ޓީމަށް ލިބޭނެއެވެ.