ގޭމް ކުޅެވޭނެ ސަރަޙައްދަކާއެކު އެސްއެމްއީ ހަބްގެ 2 ވަނަ ފަންގިފިލާ ހުޅުވައިފި

އިކޮނޮމިކް މިނިސްޓްރީގެ ދަށުން ހިންގަމުން އަންނަ ބިޒްނަސް ސެންޓަރ ކޯޕަރޭޝަން، ބީސީސީން ހިންގަމުންދާ އެސްއެމްއީ ހަބުގެ 2 ވަނަ ފަންގިފިލާ ހުޅުވައިފިއެވެ. މިތަން ހުޅުވައިދެއްވީ އެސްޓީއޯގެ މެނޭޖިން ޑިރެކްޓަރ އަބްދުﷲ ސައީދުއެވެ.

އެސްއެމްއީ ހަބް ހުޅުވާފައިވަނީ މިދިޔަ އަހަރުގެ ޑިސެމްބަރ މަހުގެ ތެރޭގައެވެ. މިއީ ރާއްޖޭގެ ކުދި ވިޔަފާރިއާއި މެދުފަންތީގެ ވިޔަފާރިތަކަށް ބާޒާރު ހޯދައި ދިނުމަށް ބީސީސީން ކުރަމުންދާ މަސައްކަތްތަކުގެ ތެރެއިން ހުޅުވުނު ތަނެކެވެ. އެންމެ ފުރަތަމަ ހުޅުވާފައިވަނީ ފުރަތަމަ ފަންގިފިލާއެވެ. މިތަނުގައި ޖުމްލަ 90 އަށް ވުރެ ގިނަ ކުދި ވިޔަފާރިތަކަށް ފުރުސަތު ދީފައިވެއެވެ.

އެސްއެމްއީ ހަބުގެ 2 ވަނަ ފަންގިފިލާ މިހާރު ހުޅުވާފައިވާއިރު ސެލޫނަކާއި، އާޓް އެންޑް ކްރާފްޓް އަދި އަންނައުނަށް ޚާއްސަ ކިއޮސްކްތައް މިތަނުގައި ހުންނާނެވެ. އަދި ކުރެހުންތެރިންގެ މަސަކަތްތައް ޕްރޮމޯޓް ކުރުމަށް ގެލެރީއަކާއި ގޭމިންގ އޭރިއާއެއްގެ އިތުރުން ކުޑަކުދިންނަށް ހާއްސަ ޕްލޭ އޭރިއާއެއްވެސް ހިމެނެއެވެ. އަދި ހަމަ އެހެންމެ ދިވެހި އުފެއްދުންތައް އުފައްދާ ފަންނާނުންނަށް ހާއްސަކޮށްގެން މިތަނުގައި ޤާއިމްކޮށްފައިވާ މިނީ ސިނަމާ ކައިރި މުސްތަގުބަލެއްގައި ހުޅުވޭނެކަމަށް ބީސީސީން ބުނެއެވެ.

އެސްއެމްއީ ހަބްގެ 2 ވަނަ ފަންގިފިލާ ހުޅުވުމުގެ ރަސްމިއްޔާތުގައި ވާހަކަދައްކަވަމުން އިކޮނޮމިކް މިނިސްޓްރީގެ ސްޓޭޓް މިނިސްޓަރ ނީޒާ އިމާދު ވިދާޅުވީ، ރާއްޖޭގެ އިޤްތިސާދުގައި އެސްއެމްއީގެ މުހިންމުކަން މި ސަރުކާރަށް އިނގޭކަމަށެވެ. އިޤްތިސާދުގެ %75 އަކީ އެސްއެމްއީ ކަމަށާއި ސަރުކާރު އައީ މި ވިޔަފާރިތައް ކުރިއެރުވުމަށް ޕްލޭނަކާއިއެކުގައިކަމަށް ނީޒާ ވިދާޅުވިއެވެ. އަދި މިފަދަ އެސްއެމްއީ ހަބްތައް މުޅި ރާއްޖެއަށް ފުޅާކުރައްވާނެކަމަށްވެސް ނީޒާ ވިދާޅުވިއެވެ.

“އަޅުގަނޑުމެންގެ ޕްލޭންގައި އޮތީ ހަމައެކަނި މާލެއަކު ނޫން އެސްއެމްއީ ހަބް ހަދަން. މިހާރު އަޅުގަނޑުމެން މަސައްކަތް ފަށައިފިން ބޮޑެތި ސިޓީތަކުގައި އެސްއެމްއީ ހަބް ހަމަ މި ފެސިލިޓީސް ހުރިހައި އަތޮޅުތަކުގައި ދިނުމަށް. އެގޮތުން ހދ. ކުޅުދުއްފުއްޓާއި އައްޑު އަތޮޅުގައިވެސް އަޅުގަނޑުމެން އެސްއެމްއީ ހަބެއް ހަދާނަން. ހަމަ އެތަނުގައިވެސް ސިނަމާއާއި އެއްޗެތި ހެދިގެންދާނެ.” ނީޒާ އިމާދު ވިދާޅުވިއެވެ.

އެސްއެމްއީ ހަބު މިހާރު ވެފައިވަނީ އާންމުންގެ މެދުގައި މަގްބޫލު ތަނަކަށެވެ. ބީސީސީން ބުނީ މިފަދަ ހަބެއް ހުޅުވުމުގެ މަޤްސަދަކަށްވީ ގޭތެރޭގައި މަސައްކަތްކުރަމުން އައި ކުދި ވިޔަފާރިތަކަށް، ބޮޑު ޚަރަދެއް ކުރަން ނުޖެހި، ކުޑަ ވިޔަފާރިއެއް ހިންގުމުގެ ތަޖުރިބާ ކޮށްލުމަށް މަގުފަހި ކޮށްދިނުންކަމަށެވެ. މީގެ އިތުރުން، ހަބްގައި ވިޔަފާރިކުރައްވާ ފަރާތްތަކަށް ބޭނުންވާ ފަންނީ އެހީތެރިކަން ފޯރުކޮށްދީ، އެ ވިޔަފާރިތައް އިތުރު ހަރުފަތަކަށް ގެންދިއުމަށްވެސް އެހީތެރިވެދޭނެކަމަށެވެ.