ޚަބަރު

ތަރައްޤީވެފައިވާ ޤައުމަކަށް ރާއްޖެ ހެދުމަށް ޢުމަރު ގެންގުޅުއްވާ ތަޞައްވުރު ހާމަކޮށްފި


  • މި ތަސައްވުރުން އިޤްތިސާދީ ބޮޑު ބަދަލެއް އަންނާނެކަށް އޭނާ ފާހަގަކުރޭ

  • މި ތަސައްވުރު ހަދާފައިވަނީ 2045 ވަނަ އަހަރާއި ހަމައަށް

ތަރައްޤީވަމުން އަންނަ ޤައުމަކުން ތަރައްޤީވެފައިވާ ޤައުމަކަށް ދިވެހިރާއްޖެ ހެދުމަށް ކުރިއަށްއޮތް ރިޔާސީ އިންތިޚާބުގައި އަމިއްލަގޮތުން ވާދަކުރައްވާ ކެންޑިޑޭޓް ޢުމަރު ނަޞީރު ގެންގުޅުއްވާ ތަޞައްވުރު ހާމަކޮށްފިއެވެ.

މި ތަޞައްވުރަކީ 2045 ވަނަ އަހަރު އަންނަންވާއިރަށް ދިވެހިރާއްޖެ ގެންދަން ބޭނުންވާ ހިސާބާއި އަދި އެ ހިސާބަށް ދިއުމަށް ކުރަންޖެހޭ ކަންކަން ހާމަކޮށްދޭ ވިޝަން ސްޓޭޓްމަންޓް ނުވަތަ ތަޞައްވުރެކެވެ.

މި ތަޞައްވުރު ހާމަކޮށްފައިވަނީ ޢުމަރު ނަސީރުގެ ކެމްޕެއިން ސްޓޫޑިއޯގައި މިރޭ ބޭއްވި ހަފްލާއެއްގައެވެ. މި ތަޞައްވުރު ހާމަކުރަމުން ޢުމަރު ވިދާޅުވީ، އިންޑިއާ އަދި ޗައިނާ އަކީ މިހާރު އެންމެ ބާރަށް ކުރިއަރަމުން އަންނަ 2 އިޤްތިޞާދުކަމަށެވެ. އެހެންކަމުން މި 2 ޤައުމުގެ ކައިރީގައި ރާއްޖެ އޮތުމުގެ ސަބަބުން އެ ޤައުމަށް އަންނަ ތަރައްޤީގެ ފައިދާ ރާއްޖެއަށް ނެގިދާނެކަމަށެވެ.

ރާއްޖެ އޮތީ ވަރަށް ވަރުގަދަ ސީރޫޓެއްގައިކަން ފާހަގަކުރައްވައި ޢުމަރު ވިދާޅުވީ، ދުނިޔޭގެ ގާތްގަނޑަކަށް 3 ބައިކޮށްފައި 2 ބައި ތެޔޮ އަދި ކޮންޓެއިނަރ އުފުލަނީ މި ރޫޓުންކަމަށެވެ. ދުވާލަކު 40 އަކަށް ބޯޓު އުލިގަމު ކައިރިން ހުރަސްކޮށްފައި ދާނެކަމަށެވެ. އެހެންކަމުން ރާއްޖޭގައި ޓްރާންޝިޕްމަންޓް ބަނދަރެއް ހަދަންޖެހޭކަމަށެވެ.

ޢުމަރު ނަސީރު ވިދާޅުވީ، އިޤްތިޞާދީގޮތުން ރާއްޖެ އެހެން ހިސާބަކަށް ގެންދިއުމަށް ރާއްޖޭގައި ފްރީ ޓްރޭޑް ޕޯޓް ބަނދަރުތަކެއްވެސް ހަދަންޖެހޭކަމަށެވެ. އަދި އެންމެ މުހިންމު ތަނަކީ އައްޑޫ ސިޓީކަން އޭނާ ފާހަގަކުރެއްވިއެވެ.

"އަޅުގަނޑުމެން ޖެހޭ އިޤްތިސާދަށްވެސް ބޮޑު ބަދަލެއް ގެންނަން. ރާއްޖޭގެ އެންމެ އުތުރުގައި ޖެހޭ ޓްރާންޝިޕްމަންޓް ބަނދަރެއް ހަދަން. މިއީ ރާއްޖޭގައި އެއްވެސް ބަޔަކަށް ކުރެވިފައި އޮތް ކަމެއްނޫން. އެކަން ކުރަންޖެހޭ ކޮންމެހެންވެސް އަޅުގަނޑުމެންގެ ވިޝަން ސްޓޭޓްމަންޓްގެ ތެރޭގައި އެކަން ހިމެނޭނެ." ޢުމަރު ވިދާޅުވެއްޖެއެވެ.

މީގެއިތުރުން ރާއްޖެއިން ބާނާ ހުރިހާ މަހަކީ ބަންދުކޮށްފައި އެކްސްޕޯޓްކުރާ މަހަށް ހަދަންޖެހޭކަމަށާއި، ސަރުކާރުން މަސްވެރިކަމުގެ ސިނާއަތުން ނިކުމެ މިއީ ޕްރައިވެޓް ސެކްޓަރއަށް ދޫކޮށްލާފައިވާ ސިނާއަތަކަށް ހަދަންޖެހޭކަމަށް އޭނާ ވިދާޅުވިއެވެ. އަދި ތަރައްޤީވެފައިވާ ޤައުމަކަށް ހެދުމަށް ސަރުކާރުގެ ތެރޭގައި ކޮރަޕްޝަން ނައްތާލަންޖެހޭކަމަށްވެސް ޢުމަރު ވިދާޅުވިއެވެ.