އެމްޑަބްލިއުއެސްސީ ދިވެހި ޕްރިމިއަރ ލީގުގައި ކުލަބު ގްރީން ސްޓްރީޓްސް އަތުން ބޮޑު މޮޅެއް ހޯދައި ތާވަލުގެ އެއްވަނައަށް ކުލަބު އީގަލްސް ޖެހިލައިފިއެވެ.
ޤައުމީ ފުޓްބޯޅަ ދަނޑުގައި މިއަދު ހަވީރު ކުޅުނު މެޗު އީގަލްސްއިން ކާމިޔާބުކުރީ 8-0 ގެ ތަފާތު ބޮޑު ނަތީޖާއަކުންނެވެ.
މި މެޗުގައި އީގަލްސްގެ ކެޕްޓަން އަހުމަދު ރިޒުވާން ހަތަރު ލަނޑު ޖެހިއިރު އިބްރާހިމް މަހުދީ ހުސެއިން ވަނީ ތިން ލަނޑުޖަހާފައެވެ.
މެޗުގައި ގޯލް ހުޅުވާލަ ދިނީ އީގަލްސްގެ ފޭދޫ އިއްބެއެވެ. އޭނާ ޖެހި ލަނޑަކީ ރިޒުވާން ގަރީންގެ ކީޕަރު ކައިރިން ނައްޓާލާފަ ހުސްކޮށްލުމަށް ފަހު ދިނުމުން ޖެހި ލަނޑެކެވެ. އީގަލްސްގެ ދެވަނަ ލަނޑު މެޗުގެ 6 ވަނަ މިނިޓުގައި ކާމިޔާބުކޮށްދިނީ ރިޒުވާންއެވެ. އީގަލްސްގެ ތިންވަނަ ލަނޑު ކާމިޔާބުކުރީ މެޗުގެ 14 ވަނަ މިނެޓުގައި ޒައިން ޒަފަރެވެ.
އީގަލްސްގެ ހަތަރުވަނަ ލަނޑު ރިޒުވާން ކާމިޔާބުކުރީ މެޗުގެ 31 ވަނަ މިނެޓުގައެވެ. ޖެހިގެން އައި މިނެޓުގައި ފޭދޫ އިއްބެ ކާމިޔާބުކުރި ލަނޑާއެކު އީގަލްސްއިން ފުރަތަމަ ހާފު ނިންމާލީ 5 ލަނޑުން ކުރީގަ އޮވެގެންނެވެ.
މެޗުގެ ދެވަނަ ހާފްގެ ފުރަތަމަ މިނެޓުގައި ފޭދޫ އިއްބެ ކާމިޔާބުކުރި ލަނޑާއެކު އީގަލްސް ހަވަނަ ލަނޑު ޖެހިއިރު އޭނާގެ ހެޓްރިކް ފުރިހަމަކުރިއެވެ. އޭގެ 8 މިނިޓުފަހުން ރިޒުވާން ވެސް ވަނީ އޭނާގެ ހެޓްރިކް ފުރިހަމަކޮށްފައެވެ. ދެވަނަ ހާފުގެ 32 ވަނަ މިނެޓުގައި އީގަލްސްގެ ހަތަރުވަނަ ލަނޑު ކާމިޔާބުކުރީ މެޗުގެ މޮޅު ކުޅުންތެރިޔާގެ މަގާމް ހޯދި ރިޒުވާންއެވެ.
މި ނަތީޖާއާއެކު ލީގުގެ އެއްވަނައިގަ އޮތް މާޒިޔާއަށް ވުރެ އެއްމެޗު އިތުރަށް ކުޅެގެން މިހާރު އީގަލްސް ވަނީ އެއް ޕޮއިންޓުގެ ލީޑެއް ނަގާފައެވެ. އީގަލްސް އެއްވަނައިގައިި އޮތީ ލީގުގައި ކުޅުނު 9 މެޗުން ލިބުނު 23 ޕޮއިންޓައާކުއެވެ.