ރަޝިޔާގެ ކުލީ ސިފައިންގެ ކުންފުނި ވާގްނަރ ގުރޫޕުގެ އިސްވެރިޔާ ޔެވްގެނީ ޕްރިގޮޜިން މަރައިލުމުގައި ޔޫކްރެއިންގެ އެއްވެސް ބައިވެރިވުމެއް ނޯންނާނެ ކަމުގައި ޔޫކްރެއިންގެ ރައީސް ވޮލޮޑޮމީރް ޒެލެންސްކީ ވިދާޅުވެއްޖެއެވެ. ޕްރިގޮޜިން މަރުވި ކަމަށް ބެލެވެނީ އޭނާ ދަތުރު ކުރަމުން ދިޔަ މަތިންދާބޯޓު ވެއްޓުނު ހާދިސާގައެވެ.
ޕްރިގޮޜިންއާއި ވާގްނަރގެ އިތުރު ބަޔަކު ތިބި ކަމަށް ބެލެވޭ މަތިންދާބޯޓު ވެއްޓިފައި ވަނީ ރަޝިޔާގެ ވެރިރަށް މޮސްކޯގެ ހުޅަނގު އުތުރުން އޮންނަ ތިއެވޭގެ ރަށެއް ކަމުގައިވާ ކުޜެންކިޔެނާއަށެވެ. ވެއްޓުނު ޕްރައިވެޓް ޖެޓުގައި ޕްރިގޮޜިންގެ އިތުރުން ވާގްނަރގެ އިސް ކޮމާންޑަރެއް ކަމުގައިވާ ދްމީތްރީ އޫތްކިން ވެސް ހިމެނެއެވެ. އޭނާއަކީ 2014 ވަނަ އަހަރު ވާގްނަރ އުފެއްދުމުގައި އިސް ދައުރެއް އަދާކޮށްފައިވާ މީހެކެވެ.
ޕްރިގޮޜިން މަރައިލުމުގައި ޔޫކްރެއިންގެ އެއްވެސް ބައިވެރިވުމެއް ނެތް ކަމުގައި ޒެލެންސްކީ ވިދާޅުވިއެވެ. "އެ ކަމުގައި އަޅުގަނޑުމެންގެ އެއްވެސް އަތެއް ނޯންނާނެ. ނަމަވެސް، އޭނާ މަރައިލުމުގެ ފަހަތުގައި އޮތީ ކޮން ބަޔެއް ކަން އެއީ އެންމެން ދަންނަ ބޮޑު ސިއްރެއް،" ޒެލެންސްކީ ވިދާޅުވިއެވެ.
ޕްރިގޮޜިން މަރުވި ހާދިސާއާ ގުޅޭ ގޮތުން ރަޝިޔާގެ ރައީސް ވްލަޑިމިޔަރ ޕުޓިން އެއްވެސް ވާހަކަފުޅެއް ދައްކަވާފައެއް ނުވެއެވެ. ދެކުނު އެފްރިކާގައި ކުރިއަށްދާ ބްރިކްސްގެ މެންބަރު ޤައުމުތަކުގެ ސަމިޓުގައި ވީޑިޔޯ މެދުވެރިކޮށް ވާހަކަފުޅު ދައްކަވަމުން ވެސް ޕުޓިން ޕްރިގޮޜިންގެ މަރަށް އަލިއަޅުއްވައިލައްވާފައެއް ނުވެއެވެ. ބޯޓު ވެއްޓުނު ހާދިސާގައި ޕްރިގޮޜިން މަރުވެފައިވާ ކަން ވެސް ރަޝިޔާއިން ރަސްމީކޮށް ކަށަވަރު ކޮށްދީފައެއް ނުވެއެވެ.
ޕްރިގޮޜިން ދަތުރު ކުރަމުންދިޔަ މަތިންދާބޯޓުގައި އޭނާއާ އެކު އިތުރު ނުވަ މީހުން ތިބި ކަމުގައި ރަޝިޔާގެ ސިވިލް އޭވިއޭޝަން އޮތޯރިޓީން ބުނެއެވެ. އެއީ، ހަތް ފަސިންޖަރުންނާއި ތިން ފަޅުވެރިންނެވެ. ބޯޓު ވެއްޓިފައިވާ ސަރަޙައްދުން 10 މީހެއްގެ ހަށިގަނޑު ފެނިފައިވާއިރު، އެއީ ކޮން ބަޔެއް ކަން ދެނެގަތުމަށް މަސައްކަތް ކުރަމުންދާ ކަމުގައި ރަޝިޔާއިން ބުނެއެވެ.
ޕްރިގޮޜިން މަރައިލުމުގެ ފަހަތުގައި ވަނީ ރަޝިޔާގެ ޚާއިނުން ކަމަށް ވާގްނަރ ގުރޫޕުގެ މެންބަރުން ދަނީ ބުނަމުންނެވެ. އަދި، ޕުޓިންއާއި ރަޝިޔާގެ އަސްކަރިއްޔާއަށް ތުހުމަތުގެ އިނގިލި ދިއްކުރާ މީހުން ވެސް މަދެއް ނޫނެވެ. އިނގިރޭސިވިލާތުގެ ދިފާޢީ ވުޒާރާގެ އިސް އޮފިޝަލުން ވިދާޅުވީ ޕްރިގޮޜިންގެ މަރުގައި ރަޝިޔާގެ ޖާސޫސީ އިދާރާ އެފް.އެސް.ބީގެ އަތެއް އޮތުން ގާތް ކަމުގައެވެ.
ޕްރިގޮޜިންނާއި އޫތްކިންގެ މަރާ އެކު ވާގްނަރ ގުރޫޕަށް ދެން ވާނެ ގޮތަކާ މެދު ވެސް ގިނަ ބަޔަކު ދަނީ ސުވާލު އުފައްދަމުންނެވެ. ޕްރިގޮޜިންއަކީ ވާގްނަރއަށް އެންމެ ބޮޑަށް ޚަރަދުކުރާ މީހާއެވެ. އަދި، ސިޔާސީ ލީޑަރުގެ އިތުރުން އިސް ކޮމާންޑަރެވެ. ޔޫތްކިންއަކީ ވާގްނަރގެ އަސްކަރީ ކޮމާންޑަރެވެ. މި ދެ މީހުންގެ މަރާ އެކު ވާގްނަރ ގުރޫޕު ނެތި ދާނެ ކަމަށް މަސްރަޙު ދިރާސާކުރާ ފަރާތްތަކުން ބުނެއެވެ.
ނަމަވެސް، އަނެއް ބަޔަކު ބުނަނީ ޕުޓިން އޭނާގެ ބާރުގެ ދަށަށް ވާގްނަރ ގުރޫޕު ގެންދާނެ ކަމަށް ބެލެވޭ ކަމުގައެވެ. އަދި، ޕުޓިންގެ ބާރުގެ ދަށުގައި ވާގްނަރގެ ނުރައްކާތެރިކަން އެތަކެއް ގުނައަކަށް އިތުރުވެގެންދާނެ ކަމަށް ވެސް އެ ފަރާތްތަކުން ބުނެއެވެ. ވާގްނަރއަކީ ރަޝިޔާ-ޔޫކްރެއިން ހަނގުރާމައިގައި އިސް ދައުރެއް އަދާކޮށްފައިވާ ފައުޖެކެވެ. މީގެ އިތުރުން އެފްރިކާގެ ބައެއް ޤައުމުތަކުގައި ވެސް ވާގްނަރއިން ދަނީ ހަރަކާތްތެރިވަމުންނެވެ.