ޕާކިސްތާނުގެ އުތުރުގައިވާ ބަޓްގަރާމްގެ ފަރުބަދަމަތީ ހިސާބެއްގައި ދަތުރުފަތުރު ކުރުމަށް ބޭނުންކުރާ ކޭބަލް ކާރެއް ހުއްޓި، އޭގައި ތާށިވި ހަތް ކުދިންނާއި ބޮޑު މީހެއް ސަލާމަތްކޮށްފިއެވެ. ކޭބަލް ކާރުގެ އެއް ވައު ކެނޑުމާ ގުޅިގެން ހިނގި މި ހާދިސާގައި އޭގެ ތެރޭގައި ތާށިވެފައި ވަނީ މުދައްރިސަކާއި ހަތް ދަރިވަރުންނެވެ. އެ މީހުން ކޭބަލް ކާރުގައި ތާށިވި ސްކޫލަށް ދަތުރު ކުރި މަގުމަތީގައެވެ.
މި ހާދިސާ ހިނގާފައިވާ ބަޓްގަރާމަކީ ވެރިރަށް އިސްލާމްއާބާދުގެ އުތުރުން 200 ކިލޯމީޓަރު ދުރުގައި އޮންނަ ސަރަޙައްދެކެވެ. ކޭބަލް ކާރުގައި ތާށިވި މީހުންގެ ތެރެއިން ހަތަރު ކުއްޖަކު ސަލާމަތް ކޮށްފައި ވަނީ އަސްކަރީ ހެލިކޮޕްޓަރެއް ބޭނުންކޮށްގެންނެވެ. ނަމަވެސް، މޫސުން ގޯސްވެ، ވައިބާރުވުމާ ގުޅިގެން އެ މަސައްކަތަކަށް ހުރަސް އެޅުނެވެ. އެއަށްފަހު، އޭގައި ތާށިވެފައި ބާކީ ތިބި ކުދިންނާއި މުދައްރިސް ސަލާމަތް ކޮށްފައި ވަނީ ކޭބަލް ކާރު ކައިރިއަށް ޕްލެޓްފޯމެއް ގެންގޮސްގެންނެވެ.
ޕާކިސްތާނުގެ އިންތިގާލީ ބޮޑުވަޒީރު އަންވާރު އަލް-ޙައްޤު ކާކަރު ވަނީ ކޭބަލް ކާރުގައި ތާށިވި ކުދިން ސަލާމަތް ކުރުމަށް އެ ޤައުމުގެ އަސްކަރިއްޔާއާއި މަދަނީ އިދާރާތަކުން ކޮށްފައިވާ ބުރަ މަސައްކަތް ފާހަގަކުރައްވައި، އެ ކަމަށް ޝުކުރު އަދާ ކުރައްވާފައެވެ. އެ ކުދިން ސަލާމަތް ކުރުމަށް ކުރަމުން ދިޔަ މަސައްކަތްތައް ޕާކިސްތާނުގެ ޓީވީ ސްޓޭޝަންތަކުން ވަނީ ވަގުތުން ދުރަށް ފޮނުވާފައެވެ. އަދި، އެތަކެއް ސަތޭކަ ހާސް ބަޔަކު ވަނީ އެ މަންޒަރުތައް ވަގުތުން ބަލާފައެވެ.
މި ހާދިސާ ހިނގާފައި ވަނީ އެ މުދައްރިސާއި ދަރިވަރުން ކޭބަލް ކާރުގައި ސްކޫލަށް ދިޔަ މަގުމަތީގައި، 900 ފޫޓު އުސް ހިސާބެއްގައެވެ. ބަޓްގަރާމްގެ އިސް އޮފިޝަލެއް ކަމުގައިވާ ޝާޙް ފަޙަދް ވިދާޅުވީ ކޭބަލް ކާރުގައި ތިބި ކުދިން ސަލާމަތް ކުރަން ޖެހުނީ ވަކިވަކިން، ފަހަރަކު ކުއްޖެއް ކަމުގައެވެ. އެ ކުދިންނާ އެކު ކޭބަލް ކާރުގައި ތާށިވި މުދައްރިސަކީ 20 އަހަރުގެ ގުލްފަރާޒެވެ. ކޭބަލް ކާރުގައި ތާށިވެފައި ވަނީ އުމުރުން 10 އަހަރާއި 15 އަހަރާއި ދެމެދުގެ އުމުރުފުރައިގެ ކުދިންނެވެ.
މި ހާދިސާ ހިނގަން މެދުވެރިވި ސަބަބު ދެނެގަތުމަށް ތަހުޤީޤު ކުރަމުންދާ ކަމުގައި ޕާކިސްތާނުގެ އޮފިޝަލުން ވިދާޅުވެއެވެ. މި ތަހުޤީޤުގެ ދަށުން ބަޓްގަރާމްގައި ކޭބަލް ކާރުގެ ޚިދުމަތްދޭ ކުންފުނީގެ ހަތަރު އޮފިޝަލަކު މިހާރު ހައްޔަރު ކޮށްފައިވާ ކަމުގައި ވެސް ރިޕޯޓުތައް ބުނެއެވެ.