ކްލަބް މޯލްޑިވްސްގެ އަންހެން ޑިވިޝަން މުބާރާތް ކަމަށްވާ އެއިޓީން ތާޓީ މުބާރާތުގެ ޗެމްޕިއަންކަން ޓީމު ފެނަކަ ހޯދައިފިއެވެ.
މިއީ މި މުބާރާތުގެ ތާރީހުގައި ފެނަކައިން އަންހެން ޑިވިޝަނުގެ ތަށި އުފުލާލި ދެވަނަ ފަހަރެވެ. އެ ޓީމު ވަނީ 2017 ގައި ވެސް ޗެމްޕިއަންކަން ހޯދާފައެވެ. މިއަހަރުގެ އަންހެން ޑިވިޝަނުގެ ޗެމްޕިއަންކަން ފެނަކަ ހޯދީ ފައިނަލުގައި ޕޮލިސް ކްލަބް އަތުން 3-1 އިން މޮޅުވެގެންނެވެ.
މި ދެ ޓީމު ވަނީ މުބާރާތުގެ ފައިނަލް މެޗުގެ ކުރިން ދެ ފަހަރު ބައްދަލުކޮށްފައެވެ. ފުރަތަމަ މެޗުން ޕޮލިސް މޮޅުވީ 1-0 އިންނެވެ. އަދި ދެވަނަ މެޗު ފެނަކައިން ކާމިޔާބުކުރީ 3-2 އިންނެވެ.
ފައިނަލް މެޗުގައި ފެނަކައިގެ ފުރަތަމަ ލަނޑު ކާމިޔާބުކޮށްދިނީ މަރިޔަމް މިރުފަތެވެ. ފެނަކައިން ލީޑު ފުޅާކޮށްދިން ލަނޑު މަރިޔަމް ނޫރާ ކާމިޔާބުކޮށްދިން އިރު ދެން ފެނުނީ ޕޮލިހުގެ ލަނޑެކެވެ. މި ލަނޑު ކާމިޔާބުކޮށްދިނީ ރާނިޔާ އިބްރާހީމެވެ. ފެނަކައިގެ ތިންވަނަ ލަނޑު ކާމިޔާބުކޮށްދިނީ ފާތިމަތު އިނާޝާ އާދަމެވެ.
މިއަހަރުގެ އެއިޓީން ތާޓީ މުބާރާތް ކުރިއަށްދިޔައީ، ފެނަކަ އާއި ޕޮލިސްގެ އިތުރުން ދިވެހި ސިފައިންގެ ކްލަބް މެދުގައެވެ.