ރަޝިޔާއާއި ޗައިނާ ގުޅިގެން ވަރުގަދަ އަސްކަރީ ތަމްރީނުތަކެއް ބާއްވާފައިވާ ކަން ރަޝިޔާގެ ދިފާޢީ ވުޒާރާއިން ހާމަކޮށްފިއެވެ. މި ތަމްރީނުތައް ބާއްވަމުން ދަނީ ޕެސިފިކް ކަނޑުގެ ސަރަޙައްދުގައެވެ. ރަޝިޔާގެ ދަޢުލަތުގެ މީޑިޔާ ތާސްއިން ވަނީ ދެ ޤައުމުގެ ގިނަ ޢަދަދެއްގެ މަނަވަރުތަކެއް ޕެސިފިކް ކަނޑުގެ ސަރަޙައްދެއްގައި އެކުގައި ދަތުރު ކުރަމުންދާ ވީޑިޔޯތަކެއް ޢާންމުކޮށްފައެވެ.
ރަޝިޔާގެ ދިފާޢީ ވުޒާރާއިން ބުނީ މި ތަމްރީނުތަކުގެ ތެރޭގައި ހާލުގައި ޖެހިފައިވާ އުޅަނދުފަހަރާއި މީހުން ސަލާމަތް ކުރުމާއި، ވައިގެ ހަމަލަތަކުން ދިފާޢުވުމުގެ އުކުޅުތައް ފަރިތަކުރުމުގެ އިތުރުން ތެޔޮ ހުސްވެ ހާލުގައި ޖެހިފައިވާ އުޅަނދުފަހަރަށް އެހީތެރިކަން ފޯރުކޮށްދިނުމާ ގުޅޭ ފަރިތަކުރުންތައް ކުރިއަށް ގެންގޮސްފައިވާ ކަމުގައެވެ. އަދި، ދެ ޤައުމުގެ މަނަވަރުތައް ޕެރިސިފް ކަނޑުގެ 6,400 ނޯޓިކަލް މޭލުގެ ސަރަޙައްދަކަށް ދަތުރު ކޮށްފައިވާ ކަމުގައި ވެސް އެ ވުޒާރާއިން ބުންޏެވެ.
މި ތަމްރީނުތައް ބާއްވާފައި ވަނީ އިރުމަތީ ޗައިނާ ކަނޑުގައި ކަމަށް ރަޝިޔާގެ ދިފާޢީ ވުޒާރާއިން ބުންޏެވެ. އަދި، ސަބްމެރިން ހަމަލަތަކުން ދިފާޢުވުމުގެ ފަރިތަކުރުންތައް ބާއްވާފައިވާ ކަމުގައި ވެސް އެ ވުޒާރާއިން ބުންޏެވެ. ޗައިނާއާއި ރަޝިޔާ ގުޅިގެން އަސްކަރީ ތަމްރީނުތަކެއް ބާއްވާފައި މި ވަނީ، ރަޝިޔާ-ޔޫކްރެއިން ހަނގުރާމައާ ގުޅިގެން ބައިނަލްއަޤުވާމީ މުޖުތަމަޢުން ރަޝިޔާ އެކަހެރިކޮށްލާފައިވާ ދަނޑިވަޅެއްގައެވެ. ނަމަވެސް، ޗައިނާއިން ދަނީ ހުޅަނގުގެ ބާރުއެޅުމަށް ނޫނެކޭ ބުނެ، ރަޝިޔާއާ ގާތް ގުޅުމެއް ބާއްވަމުންނެވެ.
އޮގަސްޓު 16 ވަނަ ދުވަހު ޗައިނާގެ ދިފާޢީ ވަޒީރު ލީ ޝެންގްފޫ ވަނީ ރަޝިޔާއަށް ދަތުރުފުޅެއް ކުރައްވާފައެވެ. އޭނާގެ ދަތުރުފުޅުގެ ބޭނުމަކީ ވެރިރަށް މޮސްކޯގައި ބޭއްވި 11 ވަނަ މޮސްކޯ ކޮންފަރެންސް އޮން އިންޓަރނޭޝަނަލް ސެކިޔުރިޓީގައި ބައިވެރިވެ ވަޑައިގެންނެވުމެވެ. މި ދަތުރުފުޅުގައި އޭނާ ވަނީ ރަޝިޔާގެ ރައީސް ވްލަޑިމިޔަރ ޕުޓިންގެ އިތުރުން ދިފާޢީ ވަޒީރު ސަރްޖޭ ޝޮއިގޫއާ ބައްދަލުކުރައްވައި، ދެ ޤައުމުގެ ދެމެދުގައި އޮތް އަސްކަރީ ގުޅުން އިތުރަށް ފުޅާ ކުރުމާ ގުޅޭ ގޮތުން މަޝްވަރާ ކުރައްވާފައެވެ.
ޗައިނާގެ ޚާރިޖީ ވުޒާރާގެ ތަރުޖަމާނު ވޮންގ ވެންބިން ވިދާޅުވީ އެ ޤައުމާއި ރަޝިޔާއާ ދެމެދު އެކި ދާއިރާތަކުން ގުޅުން ބަދަހިކުރުމާ ގުޅޭ ގޮތުން ގިނަ މަޝްވަރާތަކެއް ކުރަމުންދާ ކަމުގައެވެ. އޭގެ ތެރޭގައި ދޭދޭ ގުޅުންތަކުގެ އިތުރުން ދެ ޤައުމުން ކަންބޮޑުވާ މައްސަލަތައް ހައްލުކުރުމާ ގުޅޭ މަޝްވަރާތައް ހިމެނޭ ކަމަށާއި، ކުރިއަށް އޮތް ތަނުގައި ދެ ޤައުމުގެ ދެމެދުގައި އޮތް ގުޅުންތައް އިތުރަށް ބަދަހި ކުރަމުންދާނެ ކަމުގައި އޭނާ ވިދާޅުވިއެވެ.
އޭނާ އިޝާރާތް ކުރައްވާފައި އެ ވަނީ ހުސްވި އަހަރު ދެ ޤައުމުގެ ރައީސުންގެ މެދުގައި އެކުލަވައިލާފައިވާ އެއްބަސްވުމަކަށެވެ. ރަޝިޔާގެ ރައީސް ވްލަޑިމިޔަރ ޕުޓިންއާއި ޗައިނާގެ ރައީސް ޝީ ޖިންޕިންގ ވަނީ "ހައްދެއް ނެތް" ރަޙުމަތްތެރިކަމެއް ދެ ޤައުމުގެ ދެމެދުގައި ގާއިމުކޮށް ދަމަހައްޓަން އެއްބަސްވެފައެވެ. އެ އެއްބަސްވުން އެކުލަވައިލާފައި ވަނީ 2022 ވަނަ އަހަރުގެ ފެބުރުވަރީ މަހުގެ 24 ވަނަ ދުވަހު ރަޝިޔާ ސިފައިން ޔޫކްރެއިންގައި ހަނގުރާމަ ފެށުމުގެ ކުރިންނެވެ.