އިނގިރޭސި ޕްރިމިއަރ ލީގުގައި ނިއުކާސަލް ޔުނައިޓެޑް އަތުން އެންމެ ފަހުގެ ޗެމްޕިއަން މެންޗެސްޓާ ސިޓީން އުނދަގޫ މޮޅެއް ހޯދައިފިއެވެ.
ސިޓީގެ އަމިއްލަ ދަނޑުގައި ކުޅުނު މެޗު އެޓީމުން ކާމިޔާބުކުރީ 1-0 ގެ ނަތީޖާއަކުންނެވެ.
މި މެޗުގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފަ ވަނީ ސިޓީންނެވެ. މެޗުގައި ފެނިގެންދިޔަ ހަމައެކަނި ލަނޑު ސިޓީއަށް ކާމިޔާބުކޮށްދިނީ މެޗުގެ 31 ވަަނަ މިނިޓްގައި ހޫލިއަން އަލްވަރޭޒް އެވެ. މިއީ، ފިލް ފޯޑެން ދިން ބޯޅައަކަށް އަރައި، އަލްވަރޭޒް ގޯލުގެ މަތީ ކަނަށް ބޯޅަ ފޮނުވާލައިގެން ޖެހި ލަނޑެކެވެ.
މި މެޗުގެ ފުރަތަމަ ހާފްގައި ލަނޑު ޖަހަން ސިޓީގެ އާލިން ބްރައުޓް ހާލަންޑަށް ރަނުގެ ފުރުސަތެއް ލިބި ވަނީ ބޭކާރުވެފައެވެ. އަދި މެޗުގެ ދެވަނަ ހާފްގައިވެސް ގިނަ ފުރުސަތުތަކެއް ތަނަވަސްކޮއްފަވަނީ ސިޓީންނެވެ. މި މެޗުގައި ނިއުކާސަލްއަށް ސިޓީގެ ގޯލާ އަމާޒުކޮށް ހަމަލާއެއް ފޮނުވާލެވިފަ ވަނީ މެޗުގެ ފަހު 20 މިނިޓުގެ ތެރޭގައިއެވެ. އެގޮތުން ނިއުކާސަލްއަށް އެންމެ ރަނގަޅު ފުރުސަތު ލިބުނީ އެ ޓީމުގެ ހާވިއޭ ބާންސްއަށެވެ.
މި ނަތީޖާއާއެކު ލީގުގައި ސިޓީގެ ދަނޑުގައި އެންމެފަހުން ކުޅުނު 19 މެޗުން ވެސް ނިއުކާސްލަށް ވަނީ މޮޅެއް ނުލިބިފައެވެ. އަދި ހުސްވި ސީޒަންގައިވެސް ލީގުގެ އެންމެ ކުރީގައި އުޅުނު ހަތް ޓީމު އަތުން ނިއުކާސަލްއަށް މޮޅެއް ހޯދިފައެއް ނުވެއެވެ.