ކުޅިވަރު ވަޞީލަތްތައް ޤާއިމުކުރެއްވުމަށް ކުރިއަށްގެންދަވާ މަޝްރޫޢުތަކުގެ ތެރެއިން ހއ. އުލިގަމު ފުޓްބޯޅަ ދަނޑުގެ ޓާފް ސަޕްލައިކޮށް، އިންސްޓޯލްކުރުމުގެ މަސައްކަތް ބަޔަކާ ޙަވާލުކުރައްވައިފިއެވެ.
ކުޅިވަރާ ބެހޭ ވުޒާރާގައި ކުރިއަށްގެންދިޔަ ރަސްމިއްޔާތެއްގައި އުލިގަމު ފުޓްބޯޅަ ދަނޑުގެ ޓާފް ސަޕްލައިކޮށް، އިންސްޓޯލްކުރުމުގެ މަސައްކަތް ޙަވާލުކުރައްވާފައިވަނީ އޯޓެކްސް ޕްރައިވެޓް ލިމިޓެޑާއެވެ.
މި މަސައްކަތުގެ އެއްބަސްވުމުގައި ކުޅިވަރާ ބެހޭ ވުޒާރާގެ ފަރާތުން ސޮއިކުރެއްވީ ޑެޕިއުޓީ މިނިސްޓަރު އަޙްމަދު ފުއާދެވެ. އަދި އޯޓެކްސް ޕްރައިވެޓް ލިމިޓެޑުގެ ފަރާތުން ސޮއިކުރެއްވީ އެ ކުންފުނީގެ ޑިރެކްޓަރު އަޙްމަދު ޔާފިއު ހަސަނެވެ.
އުލިގަމު ފުޓްބޯޅަ ދަނޑުގެ ޓާފް ސަޕްލައިކޮށް، އިންސްޓޯލްކުރުމުގެ މަސައްކަތް ޙަވާލުކުރައްވާފައިވަނީ މަސައްކަތް ފަށާތާ 90 ދުވަހުގެ ތެރޭގައި ނިންމާ ގޮތަށެވެ. މި މަޝްރޫޢަކީ ކުޅިވަރާ ބެހޭ ވުޒާރާގެ ބަޖެޓުން ހަތަރު މިލިޔަން ނުވަލައްކަ ފަންސާސް އެއްހާސް އެއްސަތޭކަ ހަތްދިހަ ތިން ރުފިޔާ ފަސްދޮޅަސް ފަސް ލާރި ޚަރަދުކޮށްގެން ކުރިއަށްގެންދަން ނިންމާފައިވާ މަޝްރޫޢެކެވެ.