މަޑަގަސްކަރަގައި މި މަހު ފެށުމަށް ހަމަޖެހިފައިވާ އިންޑިއަން އޯޝަން އައިލެންޑް ގޭމްސް (އައިއޯއައިޖީ) އަށް ތައްޔާރުވުމުގެ ގޮތުން ސްރީ ލަންކާއާ ދެކޮޅަށް ކުޅުނު އެކުވެރިކަމުގެ ފަހު މެޗުންވެސް ޤައުމީ ފިރިހެން ވޮލީބޯޅަ ޓީމު ބަލިވެއްޖެއެވެ.
ޒުވާނުންގެ މަރުކަޒުގެ އެތެރޭ ކޯޓުގައި ރޭ ކުޅުނު މެޗުން ފިރިހެން ޓީމު ބަލިވީ ސީދާ ތިން ސެޓުންނެވެ. މި މެޗުގެ ކުރިން ލަންކާއާ ދެކޮޅަށް ކުޅުނު ދެ މެޗުންވެސް ފިރިހެން ޓީމު ވަނީ ސީދާ ތިން ސެޓުން ބަލިވެފައެވެ.
ރޭ ކުޅުނު މެޗުގެ ސެޓުތައް ލަންކާއިން ގެންގޮސްފައިވަނީ 25-18، 25-20 އަދި 25-21 އިންނެވެ. މި މެޗުން ސީދާ ތިން ސެޓުން ރާއްޖެ ބަލިވި ނަމަވެސް، މެޗުގައި ދެ ޓީމުގެ ފަރާތުން ވަނީ ވާދަވެރި ކުޅުމެއް ފެނިގެންގޮސްފައެވެ.
އައިއޯއައިޖީއަށް ތައްޔާރުވުމުގެ ގޮތުން ޤައުމީ ވޮލީ ޓީމުތަކުން މާލޭގައި ލަންކާއާ ދެކޮޅަށް މެޗުތަކެއް ކުޅުނުއިރު، އަންހެން ޓީމުންވެސް ވަނީ ތިން މެޗެއް ކުޅެފައެވެ. އެކަމަކު އެ ތިން މެޗުންވެސް އަންހެން ޓީމު ވަނީ ބަލިވެފައެވެ. މި މެޗުތަކުގެ ކުރިން ވޮލީ ޓީމުތަކުން ވަނީ ދާދި ފަހުން ތައިލެންޑުގެ ބެންކޮކުގައި ޓްރެއިނިން ކޭމްޕެއް ފުރިހަމަކޮށްފައެވެ.
އަދި މީގެ ކުރިންވެސް ދެ ފަަހަރެއްގެ މަތިން ލަންކާ ޓީމު ވަނީ މާލެ އައިސް ރާއްޖޭގެ ފިރިހެން ޓީމާއެކު މެޗުތަކެއް ކުޅެފައެވެ. އެ ގޮތުން 2019 ވަނަ އަަހަރުގެ އައިއޯއައިޖީގެ ކުރިންނާއި, 2021 ވަނަ އަހަރުގެ ސެންޓްރަލް ޒޯން ވޮލީބޯޅަ މުބާރާތުގެ ކުރިން ލަންކާ ޓީމުން ވަނީ މާލޭގައި މެޗުތަކެއް ކުޅެފައެވެ.
ޤައުމީ ފިރިހެން ވޮލީ ޓީމަށް މުޙައްމަދު ސާޖިދު (ކާއްޓޭ) އިރުޝާދުދެމުން އަންނައިރު، އަންހެން ވޮލީ ޓީމުގެ ކޯޗަކަށް ހުރީ ތައިލެންޑުގެ ވިޗީޕޮންއެވެ.
މި ފަހަރުގެ އައިއޯއައިޖީ ކުރިއަށްދާނީ މި މަހުގެ 25 ވަނަ ދުވަހުން ފެށިގެން އަންނަ ސެޕްޓެމްބަރު މަހުގެ ތިންވަނަ ދުވަހުގެ ނިޔަލަށެވެ.