މިހާރު ކުރިއަށްދާ ފީފާ ވިމެންސް ވޯލްޑް ކަޕް 2023 ގެ ސެމީ ފައިނަލް ދެވަނަ މެޗުގައި މުބާރާތް ބާއްވާ އެއް ޤައުމު ކަމަށްވާ އޮސްޓްރޭލިއާ ބަލިކޮށް، ފައިނަލުގެ ފަހު ޖާގަ އިންގްލަންޑުން ހޯދައިފިއެވެ.
އޮސްޓްރޭލިއާ ސްޓޭޑިއަމުގައި 75000 ސަޕޯޓަރުންގެ ކުރިމަތީގައި މިއަދު ކުޅުނު ސެމީ ފައިނަލް މެޗު އިންގްލަންޑުން ކާމިޔާބުކޮށްފައިވަނީ 3-1 ގެ ނަތީޖާއަކުންނެވެ.
މި މެޗުގައި އެންމެ ފުރަތަމަ ލަނޑު ޖަހައި ލީޑު ނެގީ އިންގްލަންޑުންނެވެ. މެޗުގެ 36 ވަނަ މިނެޓުގައި މި ލަނޑު އެ ޓީމަށް ކާމިޔާބުކޮށްދިނީ އެލާ ޓޫންއެވެ. މި ލަނޑާއެކު އޭނާ ވެފައިވަނީ ބޮޑު މުބާރާތެއްގެ ކުއާޓާ ފައިނަލާއި ސެމީ ފައިނަލުގައި އިންގްލެންޑަށް ލަނޑު ޖަހައިދިން ފުރަތަމަ ކުޅުންތެރިޔާއަށެވެ.
މި މެޗުގެ ދެވަނަ ހާފުގައި އޮސްޓްރޭލިއާއިން ކުޅުން ރަނގަޅުކުރިއިރު، މެޗުގެ 63 ވަނަ މިނެޓުގައި އެ ޓީމުން ވަނީ ނަތީޖާ އެއްވަރުކޮށްފައެވެ. މި ލަނޑު އޮސްޓްރޭލިއާއަށް ކާމިޔާބުކޮށްދިނީ ކެޕްޓަން ސޭމް ކާއެވެ.
އެކަމަކު މެޗުގެ 71 ވަނަ މިނެޓުއި ލޯރެން ހެމްްޕް ވަނީ ލަނޑެއް ޖަހައި، އިންގްލަންޑަށް އަލުން ލީޑު ނަގައިދީފައެވެ. އަދި މެޗު ނިމެން ހަތަރު މިނެޓަށް ވެފައި ވަނިކޮށް އަލެސިއާ ރޫސޯ ވަނީ ލަނޑެއް ޖަހައި، ފައިނަލުގެ ޖާގައެއް އިންގްލަންޑަށް ކަށަވަރުކޮށްދީފައެވެ.
މި މޮޅާއެކު މުބާރާތުގެ ފައިނަލަށް އިންގްލަންޑް ދަތުރުކުރިއިރު، މިއީ 1966 ވަނަ އަަހަރުގެ ފަހުން ސީނިއާ ފުޓްބޯޅައިގައި އިންގްލަންޑުގެ ޓީމެއް ވޯލްޑް ކަޕެއްގެ ފައިނަލުގައި ކުޅޭނެ ފުރަތަމަ ފަހަރެވެ. އަންނަ އާދިއްތަ ދުވަހު ކުޅޭ މި ފަހަރުގެ ވިމެންސް ވޯލްޑް ކަޕުގެ ފައިނަލުގައި އިންގްލަންޑުން ވާދަކުރާނީ ސްޕެއިނާއެވެ. މިއީ މި ދެ ޓީމުންވެސް އަންހެނުންގެ ވޯލްޑް ކަޕެއްގެ ފައިނަލުގައި ކުޅޭ ފުރަތަމަ ފަހަރެވެ.