އިންޑިއަން އޯޝަން އައިލެންޑް ގޭމްސް (އައިއޯއައިޖީ) އަށް ތައްޔާރުވުމުގެ ގޮތުން ރާއްޖޭގެ އަންހެން އަދި ފިރިހެން ވޮލީ ޓީމުތައް ސްރީ ލަންކާއާ ދެކޮޅަށް ކުޅޭ އެކުވެރިކަމުގެ މެޗުތަކުގެ ތެެރެއިން ފިރިހެން ވޮލީ ޓީމު ކުޅުނު ދެވަނަ މެޗުން ބަލިވެއްޖެ އެވެ.
ރޭ ފިރިހެން ޓީމު ދެ ވަނަ މެޗު ކުޅުނުއިރު، ބަލިވީ ސީދާ ތިން ސެޓުންނެވެ. މެޗުގައި ލަންކާ އިން ސެޓުތައް ގެންދިޔައީ 25-21, 25-16 އަދި 25-17 އިންނެވެ.
ފުރަތަމަ މެޗުތަކާ ހިލާފަށް މި ދެ މެޗުގައިވެސް ރާއްޖެއިން ވަނީ ކުޅުން ރަނގަޅުކޮށްފައެވެ. އަދި ޓީމެއްގެ ސިފައިގައި ކުރިއެރުންތަކެއް ފެނިގެންދިޔަ އެވެ. ހާއްސަކޮށް ރާއްޖޭގެ އިތުބާރު ސެޓަރު، އިޝާން މުހައްމަދު (ބަޓިސް)ގެ ތަޖުރިބާ ފެނިގެންދިޔަ އެވެ.
މީގެ ކުރިންވެސް ދެ ފަަހަރެއްގެ މަތިން ލަންކާ ޓީމު ވަނީ މާލެ އައިސް ރާއްޖޭގެ ފިރިހެން ޓީމާއެކު މެޗުތަކެއް ކުޅެފައެވެ. އެ ގޮތުން 2019 ވަނަ އަަހަރުގެ އައިއޯއައިޖީގެ ކުރިންނާއި, 2021 ވަނަ އަހަރުގެ ސެންޓްރަލް ޒޯން ވޮލީބޯޅަ މުބާރާތުގެ ކުރިން ލަންކާ ޓީމުން ވަނީ މާލޭގައި މެޗުތަކެއް ކުޅެފައެވެ.
ޤައުމީ ފިރިހެން ވޮލީ ޓީމަށް މުޙައްމަދު ސާޖިދު (ކާއްޓޭ) އިރުޝާދުދެމުން އަންނައިރު، އަންހެން ވޮލީ ޓީމުގެ ކޯޗަކަށް ހުރީ ތައިލެންޑުގެ ވިޗީޕޮންއެވެ.
މި ފަހަރުގެ އައިއޯއައިޖީ ކުރިއަށްދާނީ މި މަހުގެ 25 ވަނަ ދުވަހުން ފެށިގެން އަންނަ ސެޕްޓެމްބަރު މަހުގެ ތިންވަނަ ދުވަހުގެ ނިޔަލަށެވެ. ލަންކާއާ ދެކޮޅަށް ކުޅޭ އެކުވެރިކަމުގެ މެޗު ސީރީސްގައި މިރޭ 20:30 ގައި ކުޅޭނީ އަންހެން ގައުމީ ޓީމުގެ މެޗެކެވެ.