މިހާރު ކުރިއަށްދާ ކުލަބު މޯލްޑިވްސް ކަޕުގެ ކުއާޓާ ފައިނަލުން އެސްޓީއޯ ރެކްރިއޭޝަން ކުލަބާއި އެންމެ ފަހުގެ ޗެމްޕިއަން ޓީމު ފެނަކަ ކަޓުވާލުމަށްފަހު، މުބާރާތުގެ ސެމީ ފައިނަލުން ރޯޑް ރެކްރިއޭޝަން ކުލަބު (އާރްއާރްސީ) އާއި ޓީމު ފިއުލް ސަޕްލައި މޯލްޑިވްސް (އެފްއެސްއެމް) ޖާގަ ހޯދައިފިއެވެ.
ހުޅުމާލޭ ރެހެންދި ފުޓްސަލް ދަނޑުގައި ރޭ ކުޅުނު ފުރަތަމަ މެޗުން އާރްއާރްސީ މޮޅުވީ މުބާރާތުގެ އެންމެ ކާމިޔާބު ޓީމު ކަމަށްވާ އެސްޓީއޯ އަތުން 5-1 ގެ ނަތީޖާއަކުންނެވެ.
މި މެޗަށް އެސްޓީއޯ ނުކުތްއިރު، އެ ޓީމުގެ މުހިންމު ދެ ކުޅުންތެރިން ކަމަށްވާ އަޙްމަދު ރިޒުވާން (ރިޒޭ) އާއި އިސްމާޢީލް އީސަ (މެސީ) އެ ޓީމުގައި ނެތެވެ. މި މެޗުގެ ފުރަތަމަ ހާފުގައި ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔަ ނަމަވެސް، މި ހާފުގެ ފަހު ވަގުތު އާރްއާރްސީން ވަނީ ލީޑު ނަގާފައެވެ. މި ލަނޑު އެ ޓީމަށް ޖަހައިދިނީ އަބްދުﷲ ޔާމީން (ޔާނު) އެވެ.
އަދި ދެވަނަ ހާފުގައި އާރްއާރްސީން މޮޅު ކުޅުމެއް ދެއްކިއިރު، އެ ޓީމުގެ އަނެއް ހަތަރު ލަނޑު ޖަހައިދިނީ ޔާނުގެ އިތުރުން ދެ ލަނޑު ޖެހި އަލީ ހާފިޒް (ހާއްޕެ) އާއި ހުސެއިން ގައްސާން ލަބީބެވެ. މި މެޗުގައި އެސްޓީއޯއިން ކާމިޔާބުކުރި ހަމައެކަނި ލަނޑު ޖަހައިދިނީ މުޙައްމަދު ފާސިރު (ފާއްޓޭ) އެވެ.
މީގެ އިތުރުން މި މުބާރާތުގައި ރޭ ކުޅުނު ދެވަނަ މެޗުގައި ފެނަކަ އަތުން އެފްއެސްއެމް މޮޅުވީ ޕެނަލްޓީ ޖަހައިގެން 4-2 ގެ ނަތީޖާއަކުންނެވެ.
މި މެޗުގެ ފުރިހަމަ ވަގުތު ހަމަވިއިރު ދެ ޓީމު ވަނީ 1-1 ގެ ނަތީޖާއަކުން އެއްވަރުވެފައެވެ. މި މެޗުގެ ވަރަށް ކުރީކޮޅު ފެނަކަ ޓީމުގެ ކެޕްޓަން ހުސެއިން ނާޝިދު އެ ޓީމަށް ލީޑު ނަގައިދީފައިވަނިކޮށް، ދެވަނަ ހާފުގައި އެފްއެސްއެމުގެ އަލީ އަލްސަން ވަނީ އެ ޓީމަށް ނަތީޖާ އެއްވަރުކޮށްދީފައެވެ.
އެހެންކަމުން ނަތީޖާ ނެރުމަށް ޕެނަލްޓީ ޖެހިއިރު، ފެނަކައަށް ކާމިޔާބުކުރެވުނީ އައްޒާމް އަބްދުﷲ އާއި މުޙައްމަދު އިންޝާލް ފޮނުވާލި ޕެނަލްޓީތަކެވެ. އެކަމަކު އެ ޓީމުގެ މުޙައްމަދު އިޔާދު އަލީ އާއި ނަޝާހު އަޙްމަދުގެ ޕެނަލްޓީތައް ކާމިޔާބެއްނުވިއެވެ. އެފްއެސްއެމްއިން ހަތަރު ޕެނަލްޓީވެސް ކާމިޔާބުކުރިއިރު، އެ ޓީމުގެ ޕެނަލްޓީތައް ޖަހައިދިނީ އަޙްމަދު އައިހަމާއި، އަބްދުﷲ ޒިޔާނާއި، އަލްސަން އަދި އިބްރާހީމް ހުސެއިނެވެ.
މި ނަތީޖާއާއެކު ސެމީގައި އާރްއާރްސީ އާއި އެފްއެސްއެމް ބައްދަލުކުރާއިރު، މީގެ ކުރިން 2021 ވަނަ އަހަރު އާރްއާރްސީން ވަނީ ފައިނަލުގައި އެފްއެސްއެމް ބަލިކޮށް މުބާރާތުގެ ތަށި އުފުލާލާފައެވެ. ކުލަބު މޯލްޑިވްސް ކަޕުގެ ސެމީ ފައިނަލް މެޗުތައް އޮންނާނީ އަންނަ ބުދަ ދުވަހުގެރޭއެވެ.