އިންޓަރނޭޝަނަލް ޝޫޓިން ސްޕޯޓްސް ފެޑެރޭޝަން (އައިއެސްއެސްއެފް) އިން އިންތިޒާމުކޮށްގެން ބާއްވާ 53 ވަނަ ވޯލްޑް ޝޫޓިން ޗެމްޕިއަންޝިޕުގައި ވާދަކުރުމަށް ރާއްޖޭގެ ޝޫޓިން ޓީމު އަޒަރުބައިޖާނަށް ހިނގައްޖެއެވެ.
މި މުބާރާތް އިންނާނީ އަންނަ އަންގާރަ ދުވަހުން ފެށިގެން އަންނަ ސެޕްޓެމްބަރު މަހުގެ އެއްވަނަ ދުވަހުގެ ނިޔަލަށް އަޒަރުބައިޖާނުގެ ވެރިރަށް ބާކޫގައެވެ. މި މުބާރާތުގައި 104 ޤައުމަކުން 1260 އެތުލީޓުން، 55 ކެޓަގަރީއެއްގައި ވާދަކުރާނެއެވެ. އަދި މި މުބާރާތުގައި 12 އިންޑިވިޖުއަލް އިވެންޓް ހިމެނެއެވެ.
މޯލްޑިވްސް ޝޫޓިން އެސޯސިއޭޝަނުން މައުލޫމާތުދޭ ގޮތުގައި މި މުބާރާތުގައި ރާއްޖޭގެ އެތުލީޓުން ބައިވެރިވެފައިވަނީ 10 މީޓަރު އެއަރ ޕިސްޓަލް ކެޓެގަރީގައެވެ. މި މުބާރާތުގައި ރާއްޖެ ތަމްސީލުކުރާނީ ޒިޔާން ޒިޔާއުއެވެ. އަދި ޓީމުގެ އިސް ކޯޗެއްގެ ގޮތުގައި މި މުބާރާތުގައި ބައިވެރިވަނީ ހަސަން އަބުދުލް ޤަފޫރެވެ.
މޯލްޑިވްސް ޝޫޓިން އެސޯސިއޭޝަނުން ބުނީ މިއީ 2024 ވަނަ އަހަރުގެ އޮލިމްޕިކްސްއަށް ކޮލިފައިވުމަށްޓަކައި، ކޯޓާ ޕްލޭސް ހޯދުމަށް ވަރަށް މުހިންމު މުބާރާތެއް ކަމަށެވެ. އަދި ހަމަ އެއާއެކު މި މުބާރާތަކީ ޗައިނާގެ ހަންޒޯގައި ބޭއްވުމަށް ހަމަޖެހިފައިވާ 19 ވަނަ އޭޝިއަން ގޭމްސްއަށް ތައްޔާރުވުމުގެ ގޮތުން ލިބިގެންދާ މުހިންމު މުބާރާތެއް ކަމަށްވެސް ވަނީ ބުނެފައެވެ.