އިނގިރޭސި މިޑްފީލްޑަރު ޖޫޑް ބެލިންހަމް ކާމިޔާބުކޮށްދިން ފުރަތަމަ ލަނޑާއެކު، މި ސީޒަނުގެ ސްޕެނިޝް ލީގުގެ ފުރަތަމަ މެޗުން ރެއާލް މެޑްރިޑް މޮޅުވެއްޖެއެވެ.
ރަށުން ބޭރުގައި ރޭ ކުޅުނު މެޗުން ރެއާލް މޮޅުވީ އެތުލެޓިކް ބިލްބާއޯ އަތުން 2-0 ގެ ނަތީޖާއަކުންނެވެ.
ބިލްބާއޯގެ ސެންމެމޭސްގައި ކުޅުނު މި މެޗުގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފަވަނީ ރެއާލުންނެވެ. މި މެޗުގެ ފުރަތަމަ ލަނޑު މެޗުގެ 28 ވަނަ މިނެޓުގައި ރެއާލަށް ކާމިޔާބުކޮށްދިނީ ރޮޑްރިގޯއެވެ. އަދި އެ ޓީމުގެ ދެވަނަ ލަނޑު މެޗުގެ 36 ވަނަ މިނެޓުގައި ބެލިންހަމް ކާމިޔާބުކުރީ އަލްބާ ނަގައިދިން ކޯނަރަކުންނެވެ.
މިއީ ޖަރުމަނުގެ ބޮރޫޝިއާ ޑޯޓްމުންޑް ދޫކޮށް 88.5 މިލައަން ޕައުންޑުގެ އަގަކަށް ރެއާލާ ގުޅުނު ބެލިންހަމް، އެ ޓީމުގެ ޖާޒީގައި ކުޅުނު ވާދަވެރި ފުރަތަމަ މެޗެވެ. އަދި މިއީ ކުރީގެ އިނގިރޭސީ ކެޕްޓަން ޑޭވިޑް ބެކަމް 2007 ވަނަ އަހަރު ރެއާލުގެ ޖާޒީގައި ލަނޑު ޖެހުމަށްފަހު، އިނގިރޭސި ކުޅެންތެރިއަކު އެ ޓީމަށް ޖަހައިދިން ފުރަތަމަ ލަނޑެވެ. 2003 ވަނަ އަހަރު ބެކަމްވެސް ވަނީ ކުޅުނު ފުރަތަމަ މެޗުގައި ރެއާލަށް ލަނޑު ޖަހައިދީފައެވެ.
ބިލްބާއޯ ބަލިކޮށް ރެއާލުން މި ސީޒަނުގެ ފެށުން ރަނގަޅުކުރިއިރު، ހުސްވި ސީޒަނުގައި ރެއާލުން ލީގު ނިންމާލީ ޗެމްޕިއަންކަން ހޯދި ބާސެލޯނާއަށް ވުރެ 10 ޕޮއިންޓް ފަހަތުން ތާވަލުގެ ދެވަނައިގައެވެ.