އަރަބް ކުލަބު ޗެމްޕިއަންސް ކަޕުގެ ފައިނަލުގައި އަލް ހިލާލް ބަލިކޮށް މުބާރާތުގެ ޗެމްޕިއަންކަން އަލް ނަސްރުން ހޯދައިފިއެވެ.
ކިންގް ފަހްދު ސްޓޭޑިއަމުގައި ރޭ ކުޅުނު ފައިނަލް މެޗު އަލް ނަސްރުން ކާމިޔާބުކޮށްފައިވަނީ ފަހަތުން އަރައި 2-1 ގެ ނަތީޖާއަކުންނެވެ.
މި މެޗުގައި ފުރަތަމަ ލީޑު ނެގީ އަލް ހިލާލުންނެވެ. އެގޮތުން މެޗުގެ 51 ވަނަ މިނެޓުގައި މިލަނޑު އެ ޓީމަށް ކާމިޔާބުކޮށްދިނީ މައިކަލްއެވެ. ނަމަވެސް މެޗުގެ 74 ވަނަ މިނެޓްގައި ކްރިސްޓިއާނޯ ރޮނާލްޑޯ ވަނީ އަލް ނަސްރަށް ނަތީޖާ އެއްވަރުކޮށްދީފައެވެ.
މެޗުގެ 90 މިނެޓު ހަމަވިއިރު ދެ ޓީމު އެއްވަރުވެފައި އޮތުމުން، ނަތީޖާ ނެރުމަށް ކުޅުނު އިތުރު ވަގުތުގެ ދެ ހާފުގައި އަލް ނަސްރުން ކުޅެފައިވަނީ ނުވަ ކުޅުންތެރިންނާއެކުއެވެ. އެއީ އެ ޓީމުގެ އަލް އަމްރީ އާއި ނަވާފް ބޫސަލްއަށް ދެއްކި ރަތް ކާޑުތަކާ ގުޅިގެންނެވެ. މި މެޗުން އަލް ނަސްރު މޮޅުވި ލަނޑު އިތުރު ވަގުތުގެ ފުރަތަމަ ހާފު ފެށިގެން އަށްވަނަ މިނެޓުގައި ކާމިޔާބުކޮށްދިނީވެސް ރޮނާލްޑޯއެވެ. ރޮނާލްޑޯ މި ލަނޑު ކާމިޔާބުކުރީ އަލް ހިލާލްގެ ޕެނަލްޓީ އޭރިއާ ތެރޭގައި ހުރެ ބޮލުން ފޮނުވާލި ހަމަލާއަކުންނެވެ.
މި ދެ ލަނޑާއެކު މި މުބާރާތުގެ އެންމެ ގިނަ ލަނޑު ޖެހި ކުޅުންތެރިޔާގެ ޝަރަފު ލިބުނީ ރޮނާލްޑޯއަށެވެ. އަދި މިއީ އޭނާ އަލް ނަސްރަށް ބަދަލުވި ފަހުން އެ ކުލަބަށް ކާމިިޔާބުކޮށްދިން ފުރަތަމަ ތައްޓެވެ.
އަރަބި ޤައުމުތަކުގެ ވަރުގަދަ ކުލަބުތަކުން މި މުބާރާތުގައި ވާދަކޮށްފައިވާއިރު, އޭގެ ތެރޭގައި ސައުދީގެ އިތުރުން ގަތަރާއި, ޔޫއޭއީ އާއި، އިރާގާއި, މޮރޮކޯ އާއި، ޓިއުނީޝިއާ އަދި އަލްޖީރިއާގެ މޮޅެތި ކުލަބުތައް ހިމެނެއެވެ.