މިހާރު ކުރިއަށްދާ ކުލަބު މޯލްޑިވްސް ކަޕުގެ ކުއާޓާ ފައިނަލުން ވަރުގަދަ ކުލަބު އާބަންކޯ އާއި ސްޓެލްކޯ ކުލަބު ކަޓުވާލުމަށްފަހު، މުބާރާތުގެ ސެމީ ފައިނަލުން ކުލަބު ވެމްކޯ އާއި ޔުނައިޓެޑް ބީއެމްއެލް ޖާގަ ހޯދައިފިއެވެ.
ހުޅުމާލޭ ރެހެންދި ފުޓްސަލް ދަނޑުގައި ރޭ ކުޅުނު ފުރަތަމަ މެޗުން ވެމްކޯ މޮޅުވީ އާބަންކޯ އަތުން ޕެނަލްޓީ ޖަހައިގެންނެވެ. މި މެޗުގެ ފުރިިހަމަ ވަގުތު ހަމަވިއިރު ދެ ޓީމު އޮތީ 2-2 ގެ ނަތީޖާއަކުން އެއްވަރުވެފައެވެ. އެއާއެކު ޕެނަލްޓީގައި ވެމްކޯ ކުރި ހޯދީ 4-3 ގެ ނަތީޖާއަކުންނެވެ.
މި މެޗުގައި އެންމެ ފުރަތަމަ ލަނޑު ޖަހައި ލީޑު ނެގީ އާބަންކޯއިންނެވެ. ފުރަތަމަ ހާފުގައި ފަސް ފައުލު ހަމަވެގެން ލިބުނު ދުރު ޕެނަލްޓީއަކުން މި ލަނޑު ކާމިޔާބުކޮށްދިނީ ނާއިޒް ހަސަން (ދާދު) އެވެ. އެކަމަކު ފުރަތަމަ ހާފުގެ ފަހު ސިކުންތުކޮޅުގެ ތެރޭގައި އާބަންކޯގެ ކެޕްޓަން އަބްދުﷲ ޝާފިއު (ޝާއްޕެ) އަތުން ބައިކޮޅަށް ވަން ލަނޑާއެކު، ވެމްކޯއިން ވަނީ ނަތީޖާ އެއްވަރުކޮށްފައެވެ.
މި މެޗުގެ ދެވަނަ ހާފުގައި ހުސެއިން ޝަރީފް (އޮންލީ) ވަނީ ލަނޑެއް ޖަހައި، އާބަންކޯއަށް އަލުން ލީޑު ނަގައިދީފައެވެ. އެކަމަކު މެޗު ނިމެން ގާތްވެފައި ވަނިކޮށް ވެމްކޯގެ ކެޕްޓަން އަލީ ޝިޔާހު ވަނީ ލަނޑެއް ޖަހައި އަނެއްކާވެސް ނަތީޖާ އެއްވަރުކޮށްދީފައެވެ. މި ހާފުގައި ވެމްކޯގެ ފަސް ފައުލު ހަމަވެގެން އާބަންކޯއަށް ލިބުނު ދުރު ޕެނަލްޓީ ދާދު ފޮނުވާލި ނަމަވެސް، މި ފަހަރުގެ ވެމްކޯގެ ގޯލްކީޕަރު އަބްދުﷲ ޒިމާމް ވަނީ އެ ބޯޅަ މަތަކޮށްފައެވެ.
މި މެޗުގެ ޕެނަލްޓީ ޝޫޓްއައުޓުގައި ވެމްކޯއިން ހަތަރު ޕެނަލްޓީ ކާމިޔާބުކުރިއިރު، އާބަންކޯގެ ދާދު ފޮނުވާލި ޕެނަލްޓީ ކީޕަރު ޒިމާމް މަތަކުރިއިރު، އެ ޓީމުގެ އަބްދުﷲ ޝައްފާން (ޝާކާ) ފޮނުވާލި ޕެނަލްޓީ ދިޔައީ ގޯލާ އަމާޒުނުވެއެވެ.
މީގެ އިތުރުން މި މުބާރާތުގައި ރޭ ކުޅުނު މެޗުން ދެ ފަހަރު ޗެމްޕިއަންކަން ހޯދާފައިވާ ބީއެމްއެލް މޮޅުވީ ސްޓެލްކޯ އަތުން ފަހަތުން އަރައި 5-3 ގެ ނަތީޖާއަކުންނެވެ.
މި މެޗުގެ ކުރީކޮޅު އިބްރާހީމް ރިމާހު ސްޓެލްކޯއަށް ލީޑު ނަގައިދިން ނަމަވެސް، އޭގެ ހަތަރު މިނެޓު ފަހުން އަޙްމަދު ހުނައިފް ވަނީ ބީއެމްއެލްއަށް ނަތީޖާ އެއްވަރުކޮށްދީފައެވެ. އަދި ފުރަތަމަ ހާފު ނިމުމުގެ ކުރިން ހުސެއިން އަލީ ކާމިޔާބުކުރި ލަނޑާއެކު، ބީއެމްއެލްއިން ވަނީ އެ ޓީމު ކޮޅަށް ނަތީޖާ އަނބުރާލާފައެވެ.
މި މެޗުގެ ދެވަނަ ހާފުގެ ކުރީކޮޅު ރިމާހް ވަނީ އިތުރު ލަނޑެއް ޖަހައި، ސްޓެލްކޯއަށް ނަތީޖާ އެއްވަރުކޮށްދީފައެވެ. އެކަމަކު މެޗު ނިމެން ގާތްވެފައި ވަނިކޮށް ހައިސަމް ރަޝީދު ބީއެމްއެލްއަށް އަލުން ލީޑު ނަގައިދިންއިރު، ފަހު މިނެޓުގެ އެ ޓީމުގެ ފަސްވަނަ ލަނޑު ޖަހައިދިނީ އަޙްމަދު ނަބީލެވެ.
މި ނަތީޖާތަކާއެކު ބީއެމްއެލް އާއި ވެމްކޯ ސެމީއަށް ދަތުރުކުރިއިރު، ކުއާޓާ ފައިނަލް ފަހު ދެ މެޗު މިރޭ ކުޅެވިގެންދާނެއެވެ. އެގޮތުން ފުރަތަމަ މެޗުގައި ރޯޑް ރެކްރިއޭޝަން ކުލަބު (އާރްއާރްސީ) އާއި އެސްޓީއޯ ރެކްރިއޭޝަން ކުލަބު ބައްދަލުކުރާއިރު، ދެވަނަ މެޗުގައި ޓީމު ފިއުލް ސަޕްލައި މޯލްޑިވްސް ނުކުންނާނީ އެންމެ ފަހުގެ ޗެމްޕިއަން ޓީމު ފެނަކައާ ދެކޮޅަށެވެ.