މަޑަގަސްކަރަގައި މި މަހު ފެށުމަށް ހަމަޖެހިފައިވާ އިންޑިއަން އޯޝަން އައިލެންޑް ގޭމްސް (އައިއޯއައިޖީ) އަށް ތައްޔާރުވުމުގެ ގޮތުން ސްރީ ލަންކާއާ ދެކޮޅަށް ކުޅުނު އެކުވެރިކަމުގެ ފުރަތަމަ މެޗުތަކުން ޤައުމީ އަންހެން އަދި ފިރިހެން ވޮލީބޯޅަ ޓީމު ބަލިވެއްޖެއެވެ.
އިއްޔެ ހަވީރު ޒުވާނުންގެ މަރުކަޒު އެތެރޭ ކޯޓުގައި ކުޅުނު ފުރަތަމަ މެޗުން އަންހެން ޓީމު ބަލިވީ ސީދާ ތިން ސެޓުންނެވެ. މި މެޗުގެ ސެޓުތައް ލަންކާއިން ގެންގޮސްފައިވަނީ 25-19، 25-18 އަދި 25-17 އިންނެވެ.
ޒުވާން ގިނަ ކުޅުންތެރިންތަކެއް އަންހެން ޓީމުގައި ހިމެނޭއިރު، މެދުކެނޑުމަކަށްފަހު އައިމިނަތު އަރީޝާ ވަނީ މި ފަހަރުގެ ޤައުމީ އަންހެން ވޮލީ ޓީމުގައި ހިމެނިފައެވެ. މި މެޗުގައި ރާއްޖެއަށް އެންމެ އެދެވޭ ކުޅުމެއް ނުދެއްކުނު ނަމަވެސް، އަރީޝާ އާއި ހައްވާ ރާޝިދާ އަދި ޝަހާ ޝާމިންގެ ފަރާތުން ވަނީ ރަނގަޅު އެޓޭކުތަކެއް ފެނިގެންގޮސްފައެވެ.
މި މެޗުގެ ދެވަނަ ސެޓުގައި ރާއްޖޭގެ ޒުވާން ކުޅުންތެރިޔާ، ނަރީމާ އިދުރީސް (ނަންނި) ގެ ކަކުލަށް އަނިޔާވެގެން ވަނީ ބަދަލުކޮށްފައެވެ. އެއާއެކު ކުރިއަށް އޮތް އައިއޯއައިޖީގައި ނަންނި ފެނިދާނެ ކަމާމެދު ވަނީ ސުވާލު އުފެދިފައެވެ.
މީގެ އިތުރުން ރޭ ކުޅުނު މެޗުން ފިރިހެން ޓީމުވެސް ބަލިވީ ސީދާ ތިން ސެޓުންނެވެ. މި މެޗުގެ ސެޓުތައް ލަންކާއިން ގެންގޮސްފައިވަނީ 25-23، 25-21 އަދި 25-18 އިންނެވެ.
މި މެޗުގައި މެދުކެނޑުމަަކަށްފަހު ޓީމަށް އެނބުރި އައި ކުޅުންތެރިންނަށް އަމިއްލަ ޤައުމުގައި މެޗެއް ކުޅުމުގެ ފުރުސަތު ވަނީ ލިބިފައެވެ. އެގޮތުން ކުރީގެ ދެ ކެޕްޓަނުން ކަމަށްވާ އިޝާން މުޙައްމަދު (ބަޓިސް) އާއި އިސްމާޢީލް ސާޖިދު (ކުޑަކާއްޓެ) ވަނީ މި މެޗުގައި ފެނިގެން ގޮސްފައެވެ.
އައިއޯއައިޖީއަށް ތައްޔާރުވުމުގެ ގޮތުން ޤައުމީ ވޮލީ ޓީމުތަކުން މާލޭގައި މެޗުތަކެއް ކުޅެމުން އަންނައިރު، މި ޓީމުތަކުން ވަނީ ދާދި ފަހުން ތައިލެންޑުގެ ބެންކޮކުގައި ޓްރެއިނިން ކޭމްޕެއް ފުރިހަމަކޮށްފައެވެ.
އަދި މީގެ ކުރިންވެސް ދެ ފަަހަރެއްގެ މަތިން ލަންކާ ޓީމު ވަނީ މާލެ އައިސް ރާއްޖޭގެ ފިރިހެން ޓީމާއެކު މެޗުތަކެއް ކުޅެފައެވެ. އެ ގޮތުން 2019 ވަނަ އަަހަރުގެ އައިއޯއައިޖީގެ ކުރިންނާއި, 2021 ވަނަ އަހަރުގެ ސެންޓްރަލް ޒޯން ވޮލީބޯޅަ މުބާރާތުގެ ކުރިން ލަންކާ ޓީމުން ވަނީ މާލޭގައި މެޗުތަކެއް ކުޅެފައެވެ.
ޤައުމީ ފިރިހެން ވޮލީ ޓީމަށް މުޙައްމަދު ސާޖިދު (ކާއްޓޭ) އިރުޝާދުދެމުން އަންނައިރު، އަންހެން ވޮލީ ޓީމުގެ ކޯޗަކަށް ހުރީ ތައިލެންޑުގެ ވިޗީޕޮންއެވެ.
މި ފަހަރުގެ އައިއޯއައިޖީ ކުރިއަށްދާނީ މި މަހުގެ 25 ވަނަ ދުވަހުން ފެށިގެން އަންނަ ސެޕްޓެމްބަރު މަހުގެ ތިންވަނަ ދުވަހުގެ ނިޔަލަށެވެ.