ޓޮޓްނަމް ހޮޓްސްޕާއަށް ކުޅެމުން އައި އިންގްލަންޑުގެ ކެޕްޓަން ހެރީ ކޭން، ޖަަރުމަނުގެ ބަޔާން މިއުނިކަށް ބަދަލުވެއްޖެއެވެ.
ބަޔާން އާއި ޓޮޓްނަމުގެ މެދުގައި ދިގު ދެމިގެންދިޔަ މަޝްވަރާތަކަކަށްފަހު، ކޭންގެ ޓްރާންސްފާއަށް ދެ ކުލަބުގެ މެދުގައި އެއްބަސްވުމަކަށް އާދެވުނީ މިދިޔަ ބުރާސްފަތި ދުވަހުއެެވެ.
ރިޕޯޓުތައް ބުނާގޮތުގައި ކޭން ބަޔާނަށް ބަދަލުވީ 100 މިލިޔަން ޔޫރޯގެ ޓްރާންސްފާ ފީއަކަށެވެ. އަދި އިތުރު ބޯނަސްތަކާއެކު، މި އަދަދު 110 މިލިޔަން ޔޫރޯއަށް އެރުމުގެ ފުރުސަތު ބޮޑު ކަމަށްވެސް ރިޕޯޓުތައް ބުނެއެވެ.
ޓޮޓްނަމުގައި ގިނަ އަހަރުތެކެއް ހޭދަކުރުމަށްފަހު ކޭން އެ ޓީމު ދޫކޮށްލިއިރު، އޭނާ އަކީ އެ ކުލަބުގެ ތާރީޚުގައި އެންމެ ގިނަ ލަނޑު ޖަހާފައިވާ ކުޅުންތެރިޔާއެވެ. އެގޮތުން ކޭން ވަނީ ޓޮޓްނަމަށް ކުޅެދިން 435 މެޗުގައި 280 ލަނޑު ޖަހާފައެވެ. އަދި އޭނާ ވަނީ އިނގިރޭސި ޕްރިމިއަރ ލީގުގެ ރަން ބޫޓު ތިން ފަހަރު ހޯދާފައެވެ.
ކޭން ބުނީ ޓޮޓްނަމުގައި 20 އަހަރު ހުރުމަށްފަހު، އެ ކްލަބު ދޫކޮށްލުމަކީ ފަސޭހަކަމެއް ނޫން ކަމަށެވެ.
އެހެން ނަމަވެސް ޓޮޓްނަމުގައި ހޭދަކުރި ދިގު މުއްދަތުގައި ކޭންއަށް އެ ކުލަބާއެކު ކާމިޔާބީއެއް ހޯދިފައެއް ނުވެއެވެ. މިއީ އެހެން ކުލަބަކަށް ބަދަލުވާން ކޭން ބޭނުންވި މައިގަނޑު ސަބަބު ކަމަށް ރިޕޯޓުތައް ބުނެއެވެ.
ބަޔާނަށް ކޭން ކުޅެދިން ފުރަތަމަ މެޗަކީ މިރޭ ޖަރުމަން ސުޕަ ކަޕުގައި އާރްބީ ލައިޕްޒީގް އަތުން އެ ޓީމު ބަލިވި މެޗެވެ. އެގޮތުން އެ މެޗުގެ ދެވަނަ ހާފުގައި ކޭން ވަނީ ބަދަލު ކުޅުންތެރިއެއްގެ ގޮތުގައި ކުޅެން އަރާފައެވެ.