މިހާރު ކުރިއަށްދާ ފީފާ ވިމެންސް ވޯލްޑް ކަޕް 2023 ގެ ކުއާޓާ ފައިނަލް މެޗުތައް ކާމިޔާބުކޮށް، ސެމީ ފައިނަލުގެ ފަހު ޖާގަތައް އިންގްލަންޑާއި، މުބާރާތް ބާއްވާ އެއް ޤައުމު ކަމަށްވާ އޮސްޓްރޭލިއާއިން ހޯދައިފިއެވެ.
އެންމެ ފަހުގެ އަންހެން ޔޫރޯ ފުޓްބޯޅަ މުބާރާތް ކާމިޔާބުކުރި އިންގްލަންޑުން ސެމީގެ ޖާގައެއް ހޯދީ މިއަދު ކުޅުނު މެޗުގައި ފަހަތުން އަރައި 2-1 ގެ ނަތީޖާއަކުން ކޮލަމްބިއާ ބަލިކޮށްގެންނެވެ.
އޮސްޓްރޭލިއާގެ ސިޑްނީގެ ސްޓޭޑިއަމުގައި ކުޅުނު މި މެޗުގެ ފުރަތަމަ ހާފު ނިމން ގާތްވެފައި ވަނިކޮށް ކޮލަމްބިއާއިން ވަނީ ލީޑު ނަގާފައެވެ. މި ލަނޑު އެ ޓީމަށް ކާމިޔާބުކޮށްދިނީ ލެއިސީ ސަންޓޯސްއެވެ. އެކަމަކު ފުރަތަމަ ހާފު ނިމުމުގެ ކުރިން، އިތުރު ވަގުތުގެ ހަތްވަނަ މިނެޓުގައި ލޮރެން ހެމްޕް ވަނީ ލަނޑެއް ޖަހައި، އިންގްލަންޑަށް ނަތީޖާ އެއްވަރުކޮށްދީފައެވެ.
މި މެޗުން އިންގްލަންޑް މޮޅުވި ލަނޑު ފެނިގެންގޮސްފައިވަނީ މެޗުގެ 63 ވަނަ މިނެޓުގައެވެ. މި ލަނޑު އެ ޓީމަށް ކާމިޔާބުކޮށްދިނީ އަލޭސިއާ ރޫސޯއެވެ.
މީގެ އިތުރުން މި މުބާރާތުގެ ސެމީން އޮސްޓްރޭލިއާ ޖާގަ ހޯދީ މިއަދު ކުޅުނު މެޗުގައި ޕެނަލްޓީ ޖަހައިގެން ފްރާންސް ބަލިކުރުމަށްފަހުއެވެ.
އޮސްޓްރޭލިއާގެ ބްރިސްބޭން ސްޓޭޑިއަމުގައި ކުޅުނު މި މެޗުގައި އިތުރު ވަގުތުގެ ދެ ހާފާއެކު 120 މިނެޓު ކުޅުނުއިރު، ދެ ޓީމުން ކުރެ އެއްވެސް ޓީމަކަށް ލަނޑެއް ކާމިޔާބުކުރެވިފައެއް ނުވެއެވެ. މި މެޗުގައި ގިނައިރު ބޯޅަ ގެންގުޅެ ގިނަ ހަމަލާ އުފެއްދީ ފްރާންސުންނެވެ.
އެކަމަކު މެޗުގެ ފުރިހަމަ ވަގުތު ހަމަވިއިރު ދެ ޓީމު އެއްވަރުވުމުން ނަތިޖާ ނެރުމަށް ޖެހި ޕެނަލްޓީވެސް ފެނިގެންދިޔައީ ފޯރިގަދަކޮށެވެ. އެގޮތުން ޕެނަލްޓީ ޝޫޓްއައުޓުގައި ކޮންމެ ޓީމަކުންވެސް ވަނީ 10 ޕެނަލްޓީ ފޮނުވާލާފައެވެ. މި މެޗުން އޮސްްޓްރޭލިއާ މޮޅުވި ޕެނަލްޓީ ކާމިޔާބުކޮށްދިނީ އެ ޓީމުގެ ކޯޓްނީ ވައިންއެވެ. މި ޕެނެލްޓީ ޝޫޓްއައުޓުގައި އޮސްޓްރޭލިއާގެ ގޯލްކީޕަރު މެކެންޒީ އާނޯލްޑް ވަނީ ހަތަރު ޕެނަލްޓީއެއް މަތަކޮށްފައެވެ.
މިއީ މި އަހަރުގެ މުބާރާތުގެ އެއް ހޯސްޓް ކަމަށްވާ އޮސްޓްރޭލިއާ, ވިމެންސް ވޯލްޑް ކަޕެއްގެ ސެމީއަށް ދަތުރުކުރި ފުރަތަމަ ފަހަރެވެ. އިންގްލަންޑާއި އޮސްޓްރޭލިއާގެ އިތުރުން ދެން ސެމީއަށް ދަތުރުކުރި ޓީމުތަކަކީ ސްޕެއިނާއި ސްވިޑެންއެވެ.