އޭއެފްސީ ކަޕުގެ ޕްރިލިމިނަރީ ބުރުގައި ޑާކާ އަބަހާނީއާ ދެކޮޅަށް ކުޅެން އޮތް މެޗުގައި ވާދަކުރުމަށް ރާއްޖޭގެ ކުލަބު އީގަލްސް ބަންގްލަދޭޝަށް ފުރައިފިއެވެ.
ޕްރިލިމިނަރީ ބުރުގައި މި މަހު 16 ވަނަ ދުވަހު ބަންގްލަދޭޝްގެ ޑާކާ އަބަހާނީއާ ދެކޮޅަށް ކުޅެން އޮތް މެޗުގައި ވާދަކުރުމަށް އީގަލްސް ފުރާފައިވަނީ އިއްޔެގެ ވަގުތެއްގައެވެ. އަބަހާނީ ބަލިކޮށްގެން، މި ފަހަރުގެ ޕްލޭއޮފް ބުރަށް އީގަލްސް ދަތުރުކޮށްފިނަމަ, އެ ބުރުގައި ކުޅެން ޖެހޭނީ އިންޑިއާގެ މޯހަން ބަގާން އާއި ނޭޕާލުގެ މަޗިންދުރަ އެފްސީ ކުޅެގެން މޮޅުވާ ޓީމަކާއެވެ.
ބަންގްލަދޭޝަށް ދިޔުމަށް އީގަލްސްއިން ދިގު ދަތުރެއް ކުރަން ޖެހޭތީ އާއި އެ މެޗަށް ތައްޔާރުވާން ވަގުތު ބޭނުންވާތީ، އެމްޑަބްލިއުއެސްސީ ދިވެހި ޕްރިމިއަރ ލީގުގައި އެންމެ ފަހުގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަނާ ދެކޮޅަށް މިދިޔަ ބުދަ ދުވަހު ކުޅެން ހަމަޖެހިފައި އޮތް މެޗު، އީގަލްސްއިން އެދުނު ގޮތަށް ވަނީ ފަސްކޮށްދީފައެވެ.
ބަންގްލަދޭޝަށް ފުރުމުގެ ކުރިން މީޑިއާތަކަށް ދިން އިންޓަވިއުއެއްގައި އީގަލްސްގެ ކޯޗު މުޙައްމަދު ޝިޔާޒް މޯހަން ބުނީ ޓީމުގެ ތައްޔާރީތައް ރަނގަޅު ކަމަށާއި، އެގޮތުން ދިވެހި ޕްރިމިއަރ ލީގުގެ ފުރަތަމަ ބުރުގެ ފަހު މެޗުގައި މާޒިޔާއާ ވާދަކޮށް އެއްވަރުވި މެޗަކީ ރަނގަޅު ނަތީޖާއެއް ހޯދުނު މެޗެއް ކަމަށެވެ.
އީގަލްސްއިން މި ފަހުން ބިދޭސީ ހަ ކުޅުންތެރިއަކު ގެނެސްފައިވާއިރު، ބަންގްލަދޭޝަށް ފުރި ސްކޮޑުގައި ވަނީ ތަޖުރިބާކާރު މިޑްފީލްޑަރު ރިލްވާން ވަހީދު (ރިލޭ) ވެސް ހިމަނާފައެވެ.
މިއީ އީގަލްސްއިން އޭއެފްސީ ކަޕުގެ ކޮލިފައިންގައި ވާދަކުރާ ދެވަނަ ފަހަރެވެ. އެ ޓީމުން އެންމެ ފަހުން ކޮލިފައިންގައި ވާދަކުރި ފަަހަރު ޕްލޭއޮފްގައި ބަލިވީ ބެންގަލޫރު އެފްސީ އަތުންނެވެ. އެ ގޮތުން 2021 ގައި އީގަލްސްއިން ޕްރިލިމިނަރީ ފުރަތަމަ ބުރުގައި މާލޭގައި ބޫޓާންގެ ތިމްޕޫ ސިޓީ އަތުން ވަނީ މޮޅުވެފައެވެ. އެއާއެކު ޕްރިލިމިނަރީ ދެވަނަ ބުރުގައި އީގަލްސް ކުޅެން ޖެހުނީ ބަންގްލަދޭޝްގެ އަބަހާނީއާއެވެ. އެ ފަހަރު އަބަހާނީއަށް އެ ޤައުމުގައި މެޗު ކުޅެވޭގޮތް ނުވެ، ދަތުރުކުރުމުގައިވެސް ދަތިވެފައިވާތީވެ، އެ މެޗު އީގަލްސްއަށް ލިބި ޕްލޭއޮފަށް ދަތުރުކުރީއެވެ.