މި މަހު މަޑަގަސްކަރަގައި ބޭއްވުމަށް ހަމަޖެހިފައިވާ އިންޑިއަން އޯޝަން އައިލެންޑް ގޭމްސް (އައިއޯއައިޖީ) އަށް ތައްޔާރުވުމުގެ ގޮތުން ޤައުމީ އަންހެން އަދި ފިރިހެން ވޮލީބޯޅަ ޓީމުން މާލޭގައި ސްރީ ލަންކާއާ ދެކޮޅަށް މެޗުތަކެއް ކުޅެން ތާވަލުކޮށްފިއެވެ.
އެ ގޮތުން މި މެޗުތައް ކުޅެން ތާވަލުކޮށްފައިވާ ތާރީޚުތަކަށް ބަލާއިރު، އަންހެން ޓީމުގެ މެޗުތައް އޮންނާނީ މި މަހުގެ 12 ވަނަ ދުވަހުގެ ހަވީރާއި 13 ވަނަ ދުވަހުގެ ރޭގަނޑު އަދި 15 ވަނަ ދުވަހުގެ ރޭގަނޑެވެ. އަދި ފިރިހެން ޓީމުގެ މެޗުތައް ކުޅޭނީ 12 ވަނަ ދުވަހުގެ ރޭގަނޑާއި، 14 ވަނަ ދުވަހުގެ ރޭގަނޑު އަދި 16 ވަނަ ދުވަހުގެ ރޭގަނޑެވެ.
އައިއޯއައިޖީއަށް ތައްޔާރުވުމުގެ ގޮތުން ޤައުމީ ވޮލީ ޓީމުން ވަނީ ދާދި ފަހުން ތައިލެންޑުގެ ބެންކޮކްގައި ޓްރެއިނިން ކޭމްޕެއް ފުރިހަމަކޮށްފައެވެ. ތައިލެންޑް ކޭމްޕުގައިވެސް މެޗުތަކެއް ކުޅެފައިވާއިރު، މި މަހު މާލޭގައި ލަންކާއާ ދެކޮޅަށް އަންހެން ޓީމުން ތިން މެޗު އަދި ފިރިހެން ޓީމުންވެސް ތިން މެޗު ކުޅެން ވަނީ ތާވަލުކޮށްފައެވެ.
މީގެ ކުރިން ވެސް ދެ ފަަހަރެއްގެ މަތިން ލަންކާ ޓީމު ވަނީ މާލެ އައިސް ރާއްޖޭގެ ފިރިހެން ޓީމާއެކު މެޗުތަކެއް ކުޅެފައެވެ. އެ ގޮތުން 2019 ވަނަ އަަހަރުގެ އިންޑިއަން އޯޝަން އައިލެންޑް ގޭމްސް (އައިއޯއައިޖީ) ގެ ކުރިންނާއި 2021 ވަނަ އަހަރުގެ ސެންޓްރަލް ޒޯން ވޮލީބޯޅަ މުބާރާތުގެ ކުރިން ލަންކާ ޓީމުން ވަނީ މާލޭގައި މެޗުތަކެއް ކުޅެފައެވެ.
ޤައުމީ ފިރިހެން ވޮލީ ޓީމު މި ވަގުތު ތަމްރީނުތައް ކުރިއަށްގެންދަމުން އަންނަނީ މުޙައްމަދު ސާޖިދު (ކާއްޓޭ) ގެ ކޯޗުކަމުގައެވެ. އަދި އަންހެން ވޮލީ ޓީމުގެ ކޯޗަކަށް ހުރީ ތައިލެންޑުގެ ވިޗީޕޮންއެވެ.
މި ފަހަރުގެ އައިއޯއައިޖީ ކުރިއަށްދާނީ މި މަހުގެ 25 ވަނަ ދުވަހުން ފެށިގެން އަންނަ ސެޕްޓެމްބަރު މަހުގެ 4 ވަނަ ދުވަހުގެ ނިޔަލަށެވެ.