މެންޗެސްޓާ ސިޓީއަށް ކުޅެމުން އަންނަ އިންގްލަންޑުގެ ޑިފެންޑަރު ކައިލް ވޯކާ, އެ ކުލަބުގެ އެއްބަސްވުން އައުކުރަން ނިންމާފައިވާ ކަމަށް ރިޕޯޓުތައް ބުނެފިއެވެ.
ސިޓީގެ އެއްބަސްވުން ވޯކ އައުކުރާއިރު، އޭނާ ހޯދުމުގެ މަސައްކަތް ޖަރުމަނުގެ ބަޔާން މިއުނިކުން ވަނީ ކޮށްފައެވެ. އެގޮތުން ވޯކާ އާއެކު ބަޔާނުގެ ކޯޗު ތޯމަސް ޓުކެލް ސިއްރު ބައްދަލުވުމެއް ބޭއްވި ކަމަށްވެސް ރިޕޯޓުތައް ބުނެއެވެ.
ނަމަވެސް ރިޕޯޓުތައް ބުނާ ގޮތުން ވޯކާ މިހާރު ވަނީ ސިޓީގެ އެއްބަސްވުން އައުކުރުމަށް ނިންމާފައެވެ. އަދި ކުރިއަށް އޮތް ދުވަސްތަކުގެ ތެރޭގައި ސިޓީން ރަސްމީކޮށް އޭނާއަށް އައު އެއްބަސްވުން ހުށަހަޅާނެއެވެ. ސިޓީން ވޯކާއަށް ހުށަހަޅާނީ އިތުރު އެއް އަހަރު ދުވަހަށް އެއްބަސްވުން އައުކުރުމަށް ކަމަށް މީޑިއާތަކުން ބުނެއެވެ.
ވޯކާއާ ގުޅޭ ގޮތުން ވާހަކަދައްކަމުން ސިޓީގެ ކޯޗު ޕެޕް ގާޑިއޯލާ ބުނީ ވޯކާ އަކީ ސިޓީ އަށް ވަރަށް މުހިންމު ކުޅުންތެރިއެއް ކަމަށާއި، ވޯކާ ކަހަލަ ކުޅުންތެރިއެއް ހޯދުމަކީ ފަސޭހަކަމެއް ނޫން ކަމަށެވެ. އަދި ސިޓީގައި ވޯކާ ބަހައްޓަން ކުރެވެން އޮތް ހުރިހާ މަސައްކަތެއް ކުރާނެ ކަމަށްވެސް ވަނީ ބުނެފައެވެ.
މީގެ ކުރިން ޓޮޓްނަމް ހޮޓްސްޕާއަށް ކުޅުނު ވޯކާ ސިޓީއަށް ބަދަލުވީ 2017 ވަނަ އަހަރެވެ. އަދި ސިޓީއާއެކު ވޯކާ މިހާރު ހަދާފައިވާ އެއްބަސްވުމުގެ މުއްދަތު ހަމަވާނީ އަންނަ 2024 ވަނަ އަހަރުގެ ނިޔަލަށެވެ.