އިންޓަރނޭޝަނަލް ބޮޑީބޯޑިން ކޯޕަރޭޝަން (އައިބީސީ) ވޯލްޑް ޓުއާގައި ހިމެނޭ ވިޒިޓް މޯލްޑިވްސް ޕްރޯ 2023 ގެ ޖޫނިއާ ބައިގެ ސެމީ ފައިނަލަށް ރާއްޖޭގެ އުއްމީދީ ބޮޑީބޯޑަރު އާމިން އުމަރު މޫސާ ދަތުރުކޮށްފިއެވެ.
މުބާރާތުގެ ސެމީ ފައިނަލަށް އާމިން ދަތުރުކުރީ މުބާރާތުގެ ކުއާޓާ ފައިނަލުގެ ފުރަތަމަ ހީޓުގައި ޕޯޗުގަލްގެ އެޑުއާޑޯ މަކޭޑޯ އާއި ވާދަކޮށް ވާދަވެރި ކުރިމަތިލުމަކަށް ފަހު 1.5 ޕޮއިންޓުގެ ކުޑަ ތަފާތަކުން ކުރިހޯދައިގެންނެވެ.
މި ހީޓުގެ އެއްވަނަ އާމިން ހޯދީ 11.75 ގެ ސްކޯއަކާއެކު އެވެ. ޕޯޗުގަލްގެ ބޮޑީބޯޑަރަށް ލިބުނީ 10.25 އެވެ. މި ހީޓުގެ ކުރީކޮޅު އެޑުއާޑޯ އަށް ރަނގަޅު ރާޅުތަކެއް ލިބި ކުރީގައި އޮތް ނަމަވެސް އާމިން ތަފާތު ދެއްކީ ވަގުތު ހަމަވާން ގާތްވެފައިވަނިކޮށް ލިބުނު ރާޅުން ލިބުނު ޕޮއިންޓުތަކާއެކު އެވެ.
މުބާރާތުގެ ސެމީފައިނަލުގައި އާމިން ބައްދަލުކުރާނީ ކުއާޓާފައިނަލުގެ ހީޓު ދޭއްގެ އެއްވަނަ ހޯދި އެންމެ ފަހުން ބޭއްވި މުބާރާތުގެ ވެސް ޑިފެންޑިން ޗެމްޕިއަން ސްޕެއިންގެ އެލެގްޒަންޑާ މޮންޓޭސް އާއެވެ. އޭނާ ވާދަކުރި ހީޓުން އެއްވަނަ ހޯދީ 11.25 ޕޮއިންޓާއެކު އެވެ. މި
އާމިން އަކީ ރާއްޖޭގެ ބޮޑީބޯޑިން ތާރީޚުގައި، ބޮޑީބޯޑިން ވޯލްޑް ޓުއާގެ ފައިނަލުންވެސް ޖާގަ ހޯދި ރާއްޖޭގެ ފުރަތަމަ އެތުލީޓެވެ. އެގޮތުން އޭނާ ވަނީ މިދިޔަ އަހަރު ބޭއްވި ވިޒިޓް މޯލްޑިވްސް ޕްރޯގައި ވާދަކޮށް ޖޫނިއާ ބައިގެ ދެވަނަ ހޯދާފައެވެ. އަދި ޖޫނިއާ ބައިގެ ފައިނަލުގައި އާމިން ވަނީ މިހާތަނަށް މި މުބާރާތުގެ ޖޫނިއާ ބައިގައި، އޭނާގެ އެންމެ މަތީ ސްކޯވެސް ހޯދާފައެވެ. މީގެއިތުރުން އާމިން ވަނީ ދުނިޔޭގެ ޖޫނިއާ ރޭންކިންގެ ތިންވަނަވެސް ހޯދާފައެވެ.