އިންޓަރނޭޝަނަލް ބޮޑީބޯޑިން ކޯޕަރޭޝަން (އައިބީސީ) ވޯލްޑް ޓުއާގައި ހިމެނޭ ވިޒިޓް މޯލްޑިވްސް ޕްރޯ 2023 ގެ ޖޫނިއާ ބައިގެ ކުއާޓާ ފައިނަލަށް ރާއްޖޭގެ އާމިން އުމަރު މޫސާ ދަތުރުކޮށްފިއެވެ.
މުބާރާތުގެ ކުއާޓާ ފައިނަލަށް އާމިން ދަތުރުކޮށްފައިވަނީ މިއަދު ކުރިއަށްދިޔަ ތިންވަނަ ބުރުގެ ފުރަތަމަ ހީޓުގެ އެއްވަނަ ހޯދައިގެންނެވެ. އާމިން އެއްވަނަ ހޯދީ 12.25 ގެ ސްކޯއަކާއެކުއެވެ. މި ހީޓުގެ ދެވަނަ ހޯދާފައިވަނީ 8.40 ގެ ސްކޯއަކާއެކު އޮސްޓްރޭލިއާގެ ރަޔާން ހިލް ސްމިތެވެ. އަދި ތިންވަނަ ލިބުނީ ރާއްޖޭގެ މުޙައްމަދު ޝިބްތުއަށެވެ. އޭނާއަށް ލިބުނީ 2.55 ގެ ސްކޯއެކެވެ.
މި މުބާރާތުގެ ޖޫނިއާ ބައިގައި ރާއްޖޭގެ އިޔާން އަހުމަދާޢި މުހައްމަދު ޖަރީޝްވެސް ވަނީ ވާދަކޮށްފައެވެ. ނަމަވެސް އެ އެތުލީޓުންނަށް ލިބުނީ ވާދަކުރި ހީޓުތަކުގެ ތިންވަނައެވެ.
މި މުބާރާތުގެ ކުއާޓާ ފައިނަލުގައި އާމިން ބައްދަލުކުރަން ޖެހޭ އެތުލީޓަކީ ޕޯޗުގަލުގެ އެޑުއާޑޯ މަކޭޑޯއެވެ. އޭނާ ކުއާޓާއިން ޖާގަ ހޯދީ ވާދަކުރި ހީޓު ދޭއްގެ ދެވަނަ ހޯދައިގެންނެވެ. އެ ހީޓުގެ އެއްވަނަ ހޯދީ ސްޕެއިންގެ ޖޯޖް ހެނާންޑޭޒެވެ.
އާމިން އަކީ ރާއްޖޭގެ ބޮޑީބޯޑިން ތާރީޚުގައި، ބޮޑީބޯޑިން ވޯލްޑް ޓުއާގެ ފައިނަލުންވެސް ޖާގަ ހޯދި ރާއްޖޭގެ ފުރަތަމަ އެތުލީޓެވެ. އެގޮތުން އޭނާ ވަނީ މިދިޔަ އަހަރު ބޭއްވި ވިޒިޓް މޯލްޑިވްސް ޕްރޯގައި ވާދަކޮށް ޖޫނިއާ ބައިގެ ދެވަނަ ހޯދާފައެވެ. އަދި ޖޫނިއާ ބައިގެ ފައިނަލުގައި އާމިން ވަނީ މިހާތަނަށް މި މުބާރާތުގެ ޖޫނިއާ ބައިގައި، އޭނާގެ އެންމެ މަތީ ސްކޯވެސް ހޯދާފައެވެ. މީގެއިތުރުން އާމިން ވަނީ ދުނިޔޭގެ ޖޫނިއާ ރޭންކިންގެ ތިންވަނަވެސް ހޯދާފައެވެ.