ދުނިޔޭގެ ޗެމްޕިއަންކަން ނުވަ ފަހަރު ހޯދާފައި ހަވާއީގެ މައިކް ސްޓެވާޓް ބަލިކޮށް ވިޒިޓް މޯލްޑިވްސް ޕްރޯ 2023 ފިރިހެން ޑިވިޝަނުގެ ތިންވަނަ ބުރަށް ރާއްޖޭގެ އަލީ ޝާމް ރާފިއު ޖާގަ ހޯދައިފިއެވެ.
ޝާމް ތިންވަނަ ބުރަށް ދަތުރުކުރީ ދުނިޔޭގެ ފެންވަރުގެ ވަރުގަދަ ބޮޑީބޯޑަރުންނާ ވާދަކޮށްގެންނެވެ. މީގެތެރޭގައި ނުވަ ފަހަރު ދުނިޔޭގެ ޗެމްޕިއަންކަން ހޯދާފައިވާ މައިކް ސްޓެވާޓް ހިމެނެއެވެ.
ޝާމް އެއްވަނަ ހޯދީ 12.00 ގެ ސްކޯއަކާއެކު އެވެ. ދެވަނައަށް ދިޔަ މައިކް އަށް ލިބުނީ 11.00ގެ ސްކޯއެކެވެ. ހީޓުން ފުލަށްގޮސް ކެޓީ އޮސްޓްރޭލިއާގެ ދެ ބޮޑީބޯޑަރުންނެވެ. މިގޮތުން 9.95ގެ ސްކޯއަކާއިއެކު ތޯމަސް މޮރިސް ތިންވަނައަށް ދިޔައިރު، ޒުވާން ބޮޑީބޯޑަރު ރަޔާން ހިލް-ސްމިތަށް ލިބުނީ 5.40ގެ ސްކޯއެކެވެ.
ތިންވަނަ ބުރުގައި ޝާމް ވާދަކުރަން ޖެހޭ އެތްލީޓުންނަކީ ވިޒިޓް މޯލްޑިވްސް ޕްރޯގެ ޗެމްޕިއަން ޑޭވިޑް ހަބާޑް އާއި މޮރޮކޯގެ ބްރަހިމް އިޑޫޝް އަދި ރާއްޖޭގައި މި ވަގުތު އެންމެ ބާރަށް ކުރިއަރަމުން އަންނަ ބޮޑީބޯޑަރު އިޔާން އަހުމަދު އެވެ.
މިއީ ރާއްޖޭގެ ބޮޑީބޯޑިން ތާރީހުގައި ފާހަގަކޮށްލެވޭ ކާމިޔާބީއެކެވެ. ތިންވަނަ ބުރަށް ދަތުރުކުރުމާއެކު އޭނާ ވެފައިވަނީ އައިބީސީ ވޯލްޑް ޓުއާ މުބާރާތެއްގެ ހީޓަކުން އެއްވަނަ ހޯދި ރާއްޖޭގެ ފުރަތަމަ ބޮޑީބޯޑަރެވެ.