ކްލަބް މޯލްޑިވްސް ކަޕްގެ ގަދަ 16 ބުރުން ކުޅުނު މެޗުތައް ކާމިޔާބުކޮށް ކުއާޓާ ފައިނަލުގެ ފަހު ޖާގަތައް ރޯޑް ރެކްރިއޭޝަން ކްލަބް (އާރްއާރްސީ) އާއި އެސްޓީއޯ ރެކްރިއޭޝަން ކްލަބް، ޓީމު ފެނަކަ އަދި ޓީމު އެފްއެސްއެމް ހޯދައިފިއެވެ.
އެގޮތުން އެމްއޭސީއެލް އަތުން އާރްއާރްސީ މޮޅުވީ 1-0 ގެ ނަތީޖާއަކުންނެވެ. މޯލްޑިވިއަންގެ މައްޗަށް 3-1 އިން އެސްޓީއޯ ކުރިހޯދިއިރު، އެންމެ ފަހުގެ ޗެމްޕިއަން، ފެނަކަ އިން ވަނީ 5-1 އިން ގޭސް ކްލަބް ބަލިކޮށްފަ އެވެ. އަދި އެފްއެސްއެމް އިން ވަނީ 5-0 އިން ކްލަބް ފެން އަތުން މޮޅުވެފަ އެވެ.
އާރުއާރުސީން މޮޅުވި ހަމައެކަނި ލަނޑު ކާމިޔާބުކޮށްދިނީ އަލީ ހާފިޒް (ހާއްޕެ) ފޮނުވާލި ބޯޅައެއްގައި ހުސެއިން ގައްސާން ލަބީބެވެ. އެސްޓީއޯގެ ހުޒައިފަތު ރަޝީދު (ހުޒޭ) ދެ ގޯލު ޖެހިއިރު، އަނެއް ލަނޑު ޖެހީ އަހުމަދު ރިޒްވާން (ރިޒޭ) އެވެ. މޯލްޑިވިއަންގެ ހަމައެކަނި ލަނޑު ޖެހީ ހައްފާފު ސިދުގީއެވެ.
ގޭސް ކުލަބު އަތުން ފެނަކަ މޮޅުވި މެޗުގައި ލަނޑުތައް ޖެހީ މައްސޫދު މާޖިދު ފަލާހީ ދެ ގޯލާއި އައްޒާމް އަބްދުﷲ ، މުހައްމަދު އިޔާދު އަލީ އަދި ހުސެއިން ނާޝިދެވެ. ގޭސް ކްލަބްގެ ހަމައެކަނި ލަނޑު ޖެހީ އަހުމަދު ރަޝީދު (އައްމަޑޭ) އެވެ.
އެފްއެސްއެމްގެ ފަސް ލަނޑު ކާމިޔާބުކުރީ ދެ ގޯލު ޖެހި އައިހަމް އަހުމަދު (އައިހު) އާއި މުހައްމަދު ނާފިއު އަހުމަދު އަދި އަބްދުﷲ ޒިޔާން އެވެ.