ސްރީ ލަންކާގައި ކުރިޔަށްގެންދިޔަ ކައިޓްބޯޑިން ފްރީސްޓައިލް މުބާރާތުގެ ޗެމްޕިއަންކަން ރާއްޖޭގެ ހުނަރުވެރި ކައިޓްސާފަރ ބ. ގޮއިދޫގެ ހަސަން މާހިރު (ހަންޓޭ) ހޯދައިފިއެވެ.
މުބާރާތުގެ ޗެމްޕިއަންކަން ރާއްޖެއިން ހޯދީ ބައިނަލްއަޤްވާމީ ފާހަގަކޮށްލެވޭ އެތްލީޓުންނާ ވާދަކޮށްގެންނެވެ. މި މުބާރާތުގައި ރާއްޖެއިން ފަސް ކައިޓްސާފަރުން ވާދަކޮށްފައިވާއިރު، މުބާރާތުގެ އެއްވަނަ ހަންޓޭ ހޯދީ ޕޮއިންޓުގެ ގޮތުން ބޮޑު ތަފާތަކާއެކު އެވެ.
އެއްވަނަ ހަންޓޭ ހޯދީ ޖުމްލަ 13 ޕޮއިންޓާއެކު އެވެ. ހަންޓޭ އާއި ޖެހިގެން ދެވަނަވެސް ހޯދާފައިވަނީ ރާއްޖޭގެ އުއްމީދީ ކައިޓްސާފަރ އުމުރުން 17 އަހަރުގެ މުހައްމަދު ރާއިފް ޝާނީޒެވެ. މި ދެ އެތްލީޓުންނަކީ ވެސް ބ. ގޮއިދޫއަށް ނިސްބަތްވާ ދެ ކައިޓްސާފަރުންނެވެ. ތިންވަނަ ހޯދާފައިވަނީ ލަންކާގެ ކައިޓްސާފަރ އެއް ކަމަށްވާ ސަނަކަ ސަދާރު އެވެ.
ލަންކާގައި ހުރެ ޕީއެސްއެމް ސްޕޯޓްސްއާ ވާހަކަދައްކަމުން ހަންޓޭ ބުނީ މި ކޭމްޕުގެ ސަބަބުން ގިނަ ފައިދާތަކެއް ކުރި ކަމަށެވެ.
މުބާރާތުގެ ކުރިން ރާއްޖޭގެ 10 ކައިޓްސާފަރުން ވަނީ ލަންކާގައި ކުރިޔަށްދިޔަ ރާޅުގުޑި ކައިޓް ޓްރެއިނިން ކޭމްޕް ފުރިހަމަކޮށްފައެވެ. މި ކޭމްޕުގައި ބައިވެރިވެފައިވަނީ ރާއްޖޭގައި މިވަގުތު ތިބި އެންމެ ހުނަރުވެރި ބޮޑީބޯޑަރުންނެވެ. މީގެތެރޭގައި އަންހެން ކައިޓްސާފަރުން ހިމެނެއެވެ.
އުމުރުން 20 އަހަރުގެ ހަންޓޭ ވަނީ އުމުރުން 12 އަހަރުގައި ލަންކާގައި ބޭއްވި ބައިނަލްއަޤުވާމީ ކައިޓްސާފިން މުބާރާތުގައި ވިދާލާފައެވެ. ހަންޓޭ މިހާރު އަންނަނީ ބ. ގޮއިދޫގައި ޒުވާން ކައިޓްސާފަރުން ޑިވޮލޮޕްކުރަންވެސް މަސައްކަތް ކުރަމުންނެވެ.