ނިއު ޒީލަންޑާއި އޮސްޓްރޭލިއާގައި މިހާރު ކުރިއަށްދާ ފީފާ ވިމެންސް ވޯލްޑް ކަޕް 2023 ގެ ގަދަ 16 ބުރުން ނޯވޭ ކަޓުވާލުމަށްފަހު، މުބާރާތުގެ ކުއާޓާ ފައިނަލުން ޖަޕާން ޖާގަ ހޯދައިފިއެވެ.
ނިއު ޒީލަންޑުގެ ވެލިންޓަން ރީޖަނަލް ސްޓޭޑިއަމުގައި މިއަދު ކުޅުނު މެޗު ޖަޕާނުން ކާމިޔާބުކޮށްފައިވަނީ 3-1 ގެ ނަތީޖާއަކުންނެވެ.
2011 ވަނަ އަހަރުގެ ވޯލްޑް ކަޕުގެ ތަށި ހޯދި ޖަޕާނުން މި މެޗުގައި ރަނގަޅު ކުޅުމެއް ދެއްކިއިރު، މެޗު ފަށައިގެން 15 ވަނަ މިނެޓުގައި އެ ޓީމުން ވަނީ ލީޑު ނަގާފައެވެ. މި ލަނޑަކީ ނޯވޭގެ އިންގްރިޑް އެންގެން އަތުން ބައިކޮޅަށް ވަން ލަނޑެކެވެ.
އެކަމަކު އޭގެ ފަސް މިނެޓު ފަހުން ނޯވޭއިން ވަނީ ނަތީޖާ އެއްވަރުކޮށްފައެވެ. މި ލަނޑު އެ ޓީމަށް ކާމިޔާބުކޮށްދިނީ ގޫރޯ ރެއިޓެންއެވެ. މިއީ މި ފަހަރުގެ ވޯލްޑް ކަޕުގައި ޖަޕާން ކޮޅަށް ވަން ފުރަތަމަ ލަނޑެވެ.
މި މެޗުގައި ޖަޕާނުން އަލުން ލީޑު ނަގާފައިވަނީ ދެވަނަ ހާފު ފަށައިގެން ފަސްވަނަ މިނެޓުގައި ރީސާ ޝިމިޒޫ ކާމިޔާބުކުރި ލަނޑުންނެވެ. އަދި މެޗުގެ 81 ވަނަ މިނެޓުގައި ހިނާޓާ މިޔަޒާވާ ވަނީ ލަނޑެއް ޖަހައި، ޖަޕާނަށް ކުއާޓާގެ ޖާގައެއް ކަށަވަރުކޮށްދީފައެވެ. މިއީ މި ފަހަރުގެ މުބާރާތުގައި މިޔަޒާވާ ކާމިޔާބުކުރި ފަސްވަނަ ލަނޑެވެ.
1995 ވަނަ އަހަރުގެ މުބާރާތް ކާމިޔާބުކުރި ނޯވޭ ބަލިކޮށް ޖަޕާން ކުއާޓާއަށް ދަތުރުކުރިއރު، ކުއާޓާ ފައިނަލުގައި އެ ޓީމު ކުޅެން ޖެހޭނީ ގަދަ 16 ބުރުގައި ސްވިޑެން އާއި އެންމެ ފަހުގެ ޗެމްޕިއަން އެމެރިކާ ކުޅޭ މެޗުން މޮޅުވާ ޓީމަކާއެވެ.