ނިއު ޒީލަންޑާއި އޮސްޓްރޭލިއާގައި މިހާރު ކުރިއަށްދާ ފީފާ ވިމެންސް ވޯލްޑް ކަޕް 2023 ގެ ގްރޫޕް ޑީގެ ފަހު މެޗުގައި ހައިޓީ ބަލިކޮށް، ދެވަނަ ޓީމުގެ ގޮތުގައި ޑެންމާކް ދެވަނަ ބުރަށް ދަތުރުކޮށްފިއެވެ.
ހައިޓީގެ މައްޗަށް ޑެންމާކް ކުރިހޯދީ 2-0 ގެ ނަތީޖާއަކުންނެވެ. މި މޮޅާއެކު ޑެންމާކް ދެވަނަ ބުރަށް ދަތުރުކުރީ ގްރޫޕް ޑީގެ ދެވަނަ މަޤާމުގައި ހަ ޕޮއިންޓާއެކު އެވެ. މި ގްރޫޕުގެ އެއްވަނަ އިންގްލަންޑް ހޯދިއިރު މި ގްރޫޕުން މުބާރާތާ އަލްވަދާއު ކިޔާފައިވަނީ ޗައިނާ އާއި ހައިޓީ އެވެ. ގްރޫޕުގެ ފުލުގައި ހައިޓީ އޮތީ އެއްވެސް ޕޮއިންޓެއް ނުލިބިއެވެ.
ދުނިޔޭގެ އަންހެން ފުޓުބޯޅައިގެ 13 ވަނައިގައި އޮތް ޑެންމާކުން މި މެޗުގައި ޖެހި ފުރަތަމަ ލަނޑު ފެނިގެންދިޔައީ 21 ވަނަ މިނެޓުގައި ލިބުނު ޕެނަލްޓީއަކުންނެވެ. މި ލަނޑު އެ ޓީމަށް ކާމިޔާބުކޮށްދިނީ ދާދިފަހުން ޖަރުމަނުގެ ބަޔާން މިއުނިކަށް ސޮއިކުރި ހާޑާ އެވެ. އެ ޓީމުގެ ދެވަނަ ލަނޑު ފެނިގެންދިޔައީ މެޗުގެ ފުރިހަމަ ވަގުތު ހަމަވެގެން ކުޅުނު އިތުރު ވަގުތުގައެވެ. ގެޖީގެ އެހީތެރިކަމާއެކު މި ލަނޑު ކާމިޔާބުކުރީ ޓްރޮލްސްގާޑް އެވެ.
މިއީ އަންހެން ވޯލްޑްކަޕްގެ ތާރީހުގައި ޑެންމާކަށް ބޮޑު ކާމިޔާބީއެކެވެ. އެންމެ ފަހުން އެ ޓީމު މުބާރާތުގެ ދެވަނަބުރަށް ދަތުރުކުރީ 28 އަހަރު ކުރިން 1995 ވަނަ އަހަރުގައެވެ. ޑެންމާކް ވަނީ 1995 ވަނަ އަހަރު މުބާރާތުގެ ކުއާޓާ ފައިނަލުގައި ވާދަކޮށްފައެވެ. އެ ފަހަރު އެ ޓީމު ބަލިވީ ނޯވޭ އަތުންނެވެ.