ނިއު ޒީލަންޑާއި އޮސްޓްރޭލިއާގައި މިހާރު ކުރިއަށްދާ ފީފާ ވިމެންސް ވޯލްޑް ކަޕް 2023 ގެ ދެވަނަ ބުރަށް ޔޫރަޕުގެ ޗެމްޕިއަނުން ކަމަށްވާ އިންގްލަންޑް ދަތުރުކޮށްފިއެވެ.
މުބާރާތުގެ ދެވަނަ ބުރަށް އިންގްލަންޑް ދަތުރުކުރީ މުބާރާތުގެ ގްރޫޕް ޑީގެ ފަހު މެޗުގައި ޗައިނާއާއި ވާދަކޮށް ފަސޭހަކަމާއެކު 6-1 ގެ ނަތީޖާއަކުން މެޗު ކާމިޔާބުކޮށްގެންނެވެ.
މެޗުގައި އިންގްލަންޑްގެ ތަރިއަކަށް ވީ ޗެލްސީގެ އަންހެން ޓީމަށް ކުޅެމުން އަންނަ ލައުރެން ޖޭމްސް އެވެ. އޭނާ ވަނީ މި މެޗުގައި ދެ ލަނޑު ޖަހާ ތިން އެސިސްޓްކޮށްފައެވެ.
މެޗު ފަށައިގެން ހަތަރުވަނަ މިނެޓުގައި އިންގްލަންޑް އިން މެޗުގައި ލީޑު ނެގިއެވެ. މި ލަނޑު ކާމިޔާބުކޮށްދިނީ ރޫސޯ އެވެ. އެ ޓީމުގެ ދެވަނަ ލަނޑު ފެނިގެންދިޔައީ ފުރަތަމަ ހާފުގެ 26 ވަނަ މިނެޓުގައެވެ. މި ލަނޑު އެ ޓީމަށް ކާމިޔާބުކޮށްދިނީ ހެމްޕް އެވެ. އަދި ފުރަތަމަ ހާފުގެ ފުރިހަމަ ވަގުތު ހަމަވާން ހަތަރު މިނެޓަށްވެފައި ވަނިކޮށް ތިންވަނަ ލަނޑު ކާމިޔާބުކޮށްދިނީ ލައުރެން ޖޭމްސް އެވެ. ފުރަތަމަ ހާފު ނިމުނީ މި ނަތީޖާގަ އޮވެގެންނެވެ.
ދެވަނަ ހާފުގެ 65 ވަނަ މިނެޓުގައި ލައުރެން ޖޭމްސް އެ ޓީމުގެ ހަތަރުވަނަ ލަނޑު ޖެހިއިރު ފަސްވަނަ ލަނޑު ކެލީ ކާމިޔާބުކުރީ 77 ވަނަ މިނެޓުގައެވެ. އަދި ހަވަނަ ލަނޑު ޑެލީ ކާމިޔާބުކުރީ 84 ވަނަ މިނެޓުގައެވެ.
މެޗުގައި ޗައިނާއިން ކާމިޔާބުކުރި ހަމައެކަނި ލަނޑު ފެނިގެންދިޔައީ ޕެނަލްޓީއަކުންނެވެ. މި ލަނޑު 57 ވަނަ މިނެޓުގައި ކާމިޔާބުކުރީ ވޮންގް އެވެ.
މި މޮޅާއެކު އިންގްލަންޑް ގްރޫޕުގެ އެއްވަނައިގައި އޮތީ 9 ޕޮއިންޓާއެކު އެވެ. އަދި މުބާރާތާ އަލްވަދާއު ކިޔަން ޖެހުނު ޗައިނާ އޮތީ ތިން ޕޮއިންޓާއެކު ތާވަލުގެ ތިންވަނައިގައެވެ.
މުބާރާތުގެ ގަދަ 16 ބުރުގައި އިންގްލަންޑް ބައްދަލުކުރާނީ ނައިޖީރިއާ އާއެވެ.