ނިއު ޒީލަންޑާއި އޮސްޓްރޭލިއާގައި މިހާރު ކުރިއަށްދާ ފީފާ ވިމެންސް ވޯލްޑް ކަޕް 2023 ގެ ދެވަނަ ބުރަށް އެންމެ ފަހުގެ ޗެމްޕިއަން އެމެރިކާ އާއި ނެދަލަންޑްސް ދަތުރުކޮށްފިއެވެ.
ގްރޫޕް އީގެ ފަހު މެޗުގައި އެމެރިކާ ވަނީ ޕޯޗުގަލާ 0-0 އިން އެއްވަރުކޮށް، ހަނިގޮތަކަށް ދެވަނަ ބުރުން ފުރުސަތު ހޯދާފައެވެ. އަދި ނެދަލަންޑްސް ވަނީ 7-0 ގެ ނަތީޖާއަކުން ވިއެޓްނާމް ބަލިކޮށްފައެވެ.
އެއާއެކު ކުޅުނު ތިން މެޗުން ލިބުނު ހަތް ޕޮއިންޓާއެކު ނެދަލަންޑްސްއިން ގްރޫޕުގެ އެއްވަނަ ކަށަވަރުކުރިއިރު، އެމެރިކާއަށް ދެވަނަ ލިބުނީ ފަސް ޕޮއިންޓާއެކުއެވެ. މުބާރާތުގައި އަލަށް ވާދަކުރަމުން އަންނަ ޕޯޗުގަލުން ހަތަރު ޕޮއިންޓް ހޯދިއިރު، ގްރޫޕުގެ ފުލަށް ދިޔައީ ތިން މެޗުންވެސް ބަލިވި ވިއެޓްނާމެވެ.
އެމެރިކާ ޓީމަށް މި ފަހަރުގެ މުބާރާތުގައި އެކަށީގެންވާ ކުޅުމެއް ނުދެއްކޭތީ ފާޑުކިޔުން ވަނީ އަމާޒުވެފައެވެ. ގްރޫޕުގެ ފުރަތަމަ މެޗުގައި ވިއެޓްނާމް އަތުން 3-0 އިން މޮޅުވި ނަމަވެސް، ލަނޑު ޖަހާނެ ގިނަ ފުރުސަތުތަކެއް އެ ޓީމަށް ގެއްލުނެވެ. އަދި ދެވަނަ މެޗުގައި ވަނި ނެދަލަންޑްސްއާވެސް އެއްވަރުވެފައެވެ.
އިއްޔެ ކުޅުނު މެޗުގައި ޕޯޗުގަލުން ވަނީ އެމެރިކާގެ ވަރުގަދަ އެޓޭކުތައް ހުއްޓުވުމުގައި މޮޅު ކުޅުމެއް ދައްކާފައެވެ. އެގޮތުން އެމެރިކާގެ ލީން ވިލިއަމްސް ފޮނުވާލި ނުރައްކާތެރި ދެ ހަމަލާއެއް ޕޯޗުގަލުގެ ގޯލްކީޕަރު އިނެސް ޕެރެއިރާ ވަނީ މަތަކޮށްފައެޗެ. އަދި މެޗުގެ އިތުރު ވަގުތުގައި ޕޯޗުގަލުގެ އަނާ ކަޕޭޓާ ފޮނުވާލި ހަމަލާ އަމާޒުވީ ގޯލުގެ އަރިމަތީ ދަނޑިއަށެވެ.
ދެވަނަ ބުރުގައި އެމެރިކާ ވާދަކުރަން ޖެހޭނީ ގްރޫޕް ޖީގެ އެއްވަނަ ޓީމާއެވެ. އެ ގްރޫޕުގެ އެއްވަނައިގައި މި ވަގުތު އޮތީ ހަ ޕޮއިންޓާއެކު ސްވިޑެން އެވެ. ދެވަނައިގައި ތިން ޕޮއިންޓާއެކު އިޓަލީ އޮތްއިރު، ދެކުނު އެފްރިކާ އާއި އާޖެންޓީނާއަށް ލިބިފައިވަނީ ޕޮއިންޓެކެވެ.