ކ. ތުލުސްދޫގައި ބޭއްވި ދިވެހި ސާފް ލީގުގެ ހަތަރުވަނަ މުބާރާތް ކަމަށްވާ "ރަންދާ ރާޅުގަނޑު" ގެ އޯޕަން ބައިގެ ޗެމްޕިއަންކަން ހުސައިން އަރީފް (އިބޫ) ހޯދައިފިއެވެ.
މިއީ މި އަހަރުގެ ލީގުގައި ކާމިޔާބުކުރި ދެވަނަ މުބާރާތެވެ. އެގޮތުން އޭނާ ވަނީ ޖޫން މަހު ކ. ހިންމަފުށީގައި ބޭއްވި "ގާމާދޫކޮޅު" ގެ ޗެމްޕިއަންކަންވެސް ހޯދާފައެވެ. އޭގެ ކުރިން މ. މުލީގައި ބޭއްވި "މުލީކޮޅު ރާޅުގަނޑު" ގެ ފައިނަލުގައި އިބޫ ވާދަކުރި ނަމަވެސް، އެ ފައިނަލުން އޭނާ ބަލިވީ އަޙްމަދު އާގިލް (އައްމަޑޭ) އާ ވާދަކޮށްގެންނެވެ.
ހޯމަ ދުވަހު ނިމުނު ރަންދާ ރާޅުގަނޑުގެ ޗެމްޕިއަންކަން އިބޫ ހޯދީ، ފައިނަލުގައި އިސްމާޢީލް މިގްލާލް (ކުޑަ އިއްސެ) އާ ވާދަކޮށް ޖުމްލަ 16.83 ޕޮއިންޓް ސްކޯ ކޮށްގެންނެވެ.
ކުޑަ އިއްސެ ވަނީ އޭނާގެ ފުރަތަމަ ދެ ރާޅަށް ހަތް ޕޮއިންޓަކާއި, ދެވަނަ ރާޅަށް އަށް ޕޮއިންޓް ހޯދައިގެން ޖުމްލަ 15 ޕޮއިންޓް އެއްކޮށްފައެވެ. ފައިނަލް ހީޓުގައި އިބޫ އެޅި ތިންވަނަ ރާޅަށް 7.33 ޕޮއިންޓް ހޯދި އިރު، ލީޑު ނެގީ ނުވަވަނަ ރާޅަށް ހޯދި 9.50 ޕޮއިންޓާއެކުއެވެ.
މި އާއެކު ސާފް ލީގުގެ ފަހު އިވެންޓް ކަމަށްވާ "ރަންނަމާރި ޗެލެންޖް" އާ ކުރިމަތި ލާއިރު، މި އަހަރުގެ ލީގު ކާމިޔާބުކުރުމުގެ އެންމެ ބޮޑު ފުރުސަތެއް އޮތީވެސް އިބޫ އަށެވެ. އެގޮތުން ލީގުގައި އިބޫއަށް ވަނީ 2860 ޕޮއިންޓް ލިބިފައެވެ.
މީގެ އިތުރުން ރަންދާ ރާޅުގަނޑުގެ ޖޫނިއާ ބައިގެ ޗެމްޕިއަންކަން ހޯދާފައިވަނީ އުއްމީދީ ރާޅާއެޅުންތެރިޔާ ސައްޔިދު ސަލާހުއްދީނެވެ. ސައްޔިދު ޗެމްޕިއަންކަން ހޯދީ ފައިނަލް ހީޓުގައި 12.50 ޕޮއިންޓް އެއްކޮށް، 7.84 ޕޮއިންޓް ހޯދި ޔޫސުފް ކަޔާން ހަމްދާން ޒަކީގެ މައްޗަށް ކުރި ހޯދައިގެންނެވެ.