ނިއު ޒީލަންޑާއި އޮސްޓްރޭލިއާގައި މިހާރު ކުރިއަށްދާ ފީފާ ވިމެންސް ވޯލްޑް ކަޕް 2023 ގެ ދެވަނަ ބުރަށް މުބާރާތުގެ އެއް ހޯސްޓް ކަމަށްވާ އޮސްޓްރޭލިއާ އާއި ނައިޖީރިއާ ދަތުރުކޮށްފިއެވެ.
ގްރޫޕް ބީގައި އިއްޔެ ކުޅުނު މެޗުން އޮސްޓްރޭލިއާ ވަނީ ކެނެޑާ އަތުން 4-0 ގެ ނަތީޖާއަކުން މޮޅުވެފައެވެ. އަދި ނައިޖީރިއާ ވަނީ އަޔަލަންޑާ ބައްދަލުކޮށް ލަނޑެއް ނުޖެހި އެއްވަރުވެފައެވެ.
އޮސްޓްރޭލިއާގެ މެލްބަން ރެކްޓޭންގިއުލަރ ސްޓޭޑިއަމުގައި އިއްޔެ ކުޅުނު މެޗުގެ ވަރަށް ކުރީކޮޅު އެ ޤައުމުން ވަނީ ލީޑު ނަގާފައެވެ. މެޗުގެ ނުވަވަނަ މިނެޓުގައި މި ލަނޑު އޮސްޓްރޭލިއާއަށް ކާމިޔާބުކޮށްދިނީ ހޭލީ ރަސޯއެވެ. އޭގެ ފަހުން މެޗުގެ 34 ވަނަ މިނެޓުގައި އޮސްޓްރޭލިއާގެ މޭރީ ފޯލާ ލަނޑެއް ޖެހި ނަމަވެސް، ވީޑިއޯ އެސިސްޓަންޓް ރެފުރީ (ވީއޭއާރް) އިން ވަނީ އެ ލަނޑު އޮފްސައިޑް ކަމަށް ނިންމާފައެވެ.
މި މެޗުގައި އޮސްޓްރޭލިއާއިން ލީޑު ފުޅާކުރީ މެޗުގެ 39 ވަނަ މިނެޓުގައެވެ. މި ލަނޑު އެ ޓީމަށް ކާމިޔާބުކޮށްދިނީ ފުރަތަމަ ލަނޑުވެސް ޖަހައިދިން ރަސޯއެވެ. އަދި ދެވަނަ ހާފު ފަށައިގެން 13 ވަނަ މިނެޓުގައި ފޯލާ ވަނީ އޮސްޓްރޭލިއާގެ ތިންވަނަ ލަނޑު ޖަހައިދީފައެވެ. ދެން މި މެޗުގައި އޮސްޓްރޭލިއާއިން ކާމިޔާބުކުރި ފަހު ލަނޑު މެޗުގެ އިތުރު ވަގުތުގައި ލިބުނު ޕެނަލްޓީއަކުން ކާމިޔާބުކޮށްދިނީ ސްޓެފް ކެޓްލީއެވެ.
މި މޮޅާއެކު ގްރޫޕް ބީގެ އެއްވަނަ ޓީމުގެ ގޮތުގައި އޮސްޓްރޭލިއާ ދެވަނަ ބުރަށް ދަތުރުކުރިއިރު، އެ ޓީމަށް ވަނީ ކުޅުނު ތިން މެޗުން ހަ ޕޮއިންޓް ލިބިފައެވެ. އަދި ދެވަނަ ޓީމުގެ ގޮތުގައި ދެވަނަ ބުރަށް ދަތުރުކުރި ނައިޖީރިއާއަށް ތިން މެޗުން ލިބިފައިވަނީ ފަސް ޕޮއިންޓެވެ. މި ގްރޫޕުގެ ތިންވަނައަށް ދިޔަ ކެނެޑާއަށް ތިން މެޗުން ހަތަރު ޕޮއިންޓް ލިބިފައިވާއިރު، ފުލަށް ދިޔަ އަޔަލަންޑަށް ލިބުނީ އެންމެ ޕޮއިންޓެކެވެ.