ނިއު ޒީލަންޑާއި އޮސްޓްރޭލިއާގައި މިހާރު ކުރިއަށްދާ ފީފާ ވިމެންސް ވޯލްޑް ކަޕް 2023 ގައި ހޯދި ފުރަތަމަ މޮޅާއެކު ޒެމްބިއާއިން މުބާރާތް ނިންމާލައިފިއެވެ.
ނިއު ޒީލަންޑުގެ ވައިކަޓޯ ސްޓޭޑިއަމުގައި މިއަދު ކުޅުނު މެޗު ޒެމްބިއާއިން ކާމިޔާބުކުރީ ކޮސްޓަ ރީކާއާ ވާދަކޮށް 3-1 ގެ ނަތީޖާއަކުންނެވެ.
ވާދަވެރި ކުޅުމެއް ފެނިގެންދިޔަ މި މެޗުގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފަވަނީ ޒެމްބިއާއިންނެވެ. އެގޮތުން މެޗު ފަށައިގެން ތިންވަނަ މިނެޓުގައި ޒެމްބިއާއިން ވަނީ ލީޑު ނަގާފައެވެ. މި ލަނޑު އެ ޓީމަށް ކާމިޔާބުކޮށްދިނީ ލުޝޯމާ ވީންބާއެވެ. މިއީ މުބާރާތުގެ ތާރީޚުގައިވެސް ޒެމްބިއާއިން ކާމިޔާބުކުރި ފުރަތަމަ ލަނޑެވެ.
މި މެޗުގައި ޒެމްބިއާގެ ދެވަނަ ލަނޑަކީ ލިބުނު ޕެނަލްޓީއަކުން ކާމިޔާބުކުރި ލަނޑެވެ. މެޗުގެ 31 ވަނަ މިނެޓުގައި މި ޕެނެލްޓީ ގޯލުގެ ތެރެއަށް ވައްދާލީ ބާބްރާ ބަންޑާއެވެ. މިއީ އަންހެނުންގެ ވޯލްޑް ކަޕުގެ ތާރީޚުގައި ފެނިގެންދިޔަ 1000 ވަނަ ލަނޑެވެ.
މި މެޗުގެ ދެވަނަ ހާފުގެ ފެށުން ރަނގަޅުވީ ކޮސްޓަ ރީކާގެއެވެ. އެގޮތުން މި ހާފު ފަށައިގެން ދެވަނަ މިނެޓުގައި ކޮސްޓަ ރީކާއިން ވަނީ ފަރަގު ކުޑަކޮށްފައެވެ. މި ލަނޑު އެ ޓީމަށް ޖަހައިދިނީ މެލިއްސާ ހެރޭރާއެވެ. މި މެޗުގައި ޒެމްބިއާއިން އަލުން ލީޑު ފުޅާކުރީ މެޗުގެ އިތުރު ވަގުތުގައި ރިޗީލް ކުނަންޖީ ކާމިޔާބުކުރި ލަނޑުންނެވެ.
މި މެޗުން ކޮސްޓަ ރީކާ ބަލިވިއިރު، އެ ޓީމު އޮތީ ގްރޫޕް ސީގެ ފުލުގައި ކުޅުނު ތިން މެޗުންވެސް ބަލިވެ ޕޮއިންޓެއް ނުލިބިއެވެ. މިއީ މޮޅެއް ނުލިބި ކޮސްޓަ ރީކާއަށް ނިންމާލަން ޖެހުނު ދެވަނަ ވޯލްޑް ކަޕެވެ.