ނިއު ޒީލަންޑާއި އޮސްޓްރޭލިއާގައި މިހާރު ކުރިއަށްދާ ފީފާ ވިމެންސް ވޯލްޑް ކަޕް 2023 ގައި ސްޕެއިން ބަލިކޮށް ގުރޫޕް ސީގެ އެއްވަނަ ޓީމުގެ ގޮތުގައި ޖަޕާން ދެވަނަ ބުރަށް ދަތުރުކޮށްފިއެވެ.
މި ގްރޫޕުގެ ފަހު މެޗުގައި ޖަޕާނުން ސްޕެއިނުގެ މައްޗަށް ކުރިހޯދީ ފަސޭހަކަމާއެކު 4-0 ގެ ނަތީޖާއަކުންނެވެ.
ނިއު ޒީލަންޑުގެ ވެލިންޓަން ރީޖަނަލް ސްޓޭޑިމުގައި މިއަދު ކުޅުނު މެޗުގައި ގަނައިރު ބޯޅަ ގެންގުޅެ ގިނަ ހަމަލާ އިފެއްދީ ސްޕެއިނުންނެވެ. ވިހިހާސް ސަޕޯޓަރުންގެ ކުރިމަތީގައި ކުޅުނު މެޗުގައި ޖަޕާނުން ވަނީ ވަރަށް ކުރީކޮޅު ލީޑު ނަގާފައެވެ. މެޗު ފަށައިގެން 12 ވަނަ މިނެޓުގައި މި ލަނޑު އެ ޓީމަށް ކާމިޔާބުކޮށްދިނީ ހިނަޓާ މިޔަޒާވާއެވެ.
އަދި ޖަޕާނުން ވަނީ ފުރަތަމަ ހާފު ނިމުމުގެ ކުރިން އިތުރު ދެ ލަނޑު ޖާހަފައެވެ. މި ލަނޑުތައް އެ ޓީމަށް ކާމިޔާބުކޮށްދިނީ ރިކޯ އުކީގެ އިތުރުން މިޔަޒާވާއެވެ.
2011 ވަނަ އަހަރުގެ ވޯލްޑް ކަޕުގެ ތަށި ހޯދި ޖަޕާން މި މެޗުގައި ފެނިގެންދިޔައީ ގޯލާ ރައްޓިހެކޮށެވެ. އެގޮތުން މެޗު ނިމެން އަށް މިނެޓަށް ވެފައިވަނިކޮށް އެ ޓީމުން ވަނީ ހަތަރުވަނަ ލަނޑެއް ޖަހާފައެވެ. މި ލަނޑު ޖަޕާނަށް ކާމިޔާބުކޮށްދިނީ ބަދަލު ކުޅުންތެރިއެއްގެ ގޮތުގައި ކުޅެން ނުކުތް މިނާ ޓަނަކާއެވެ.
މި މޮޅާއެކު މުބާރާތުގެ ގުރޫޕް ސްޓޭޖުގައި ކުޅުނު ތިން މެޗުވެސް ކާމިޔާބުކޮށް ޖަޕާން ދެވަނަ ބުރަށް ދިޔައީ ސައްތައިން ސައްތަ ރިކޯޑަކާއެކުވެ. މުބާރާތުގެ ދެވަނަ ބުރުގައި އަންނަ ހޮނިހިރު ދުވަހު ޖަޕާން ނުކުންނާނީ 1995 ވަނަ އަހަރުގެ މުބާރާތް ކާމިޔާބުކުރި ނޯވޭއާ ދެކޮޅަށެވެ.