ނިއު ޒީލަންޑާއި އޮސްޓްރޭލިއާގައި މިހާރު ކުރިއަށްދާ ފީފާ ވިމެންސް ވޯލްޑް ކަޕް 2023 ގައި ފަހު ވަގުތު ވަރުގަދަ ޖަރުމަން ބަލިކޮށް ދެވަނަ ބުރަށް ކޮލިފައިވުމާ ގާތަށް ކޮލަމްބިއާ ޖެހިލައިފިއެވެ.
އޮސްޓްރޭލިއާގެ ސިޑްނީ ފުޓްބޯލް ސްޓޭޑިއަމުގައި އިއްޔެ ކުޅުނު މެޗު ކޮލަމްބިއާއިން ކާމިޔާބުކުރީ 2-1 ގެ ނަތީޖާއަކުންނެވެ.
މި މެޗުގެ ފުރަތަމަ ހާފުގައި ލަނޑެއް ނުފެނުނު ނަމަވެސް، މި ހާފުގައި ދެ ޓީމަށްވެސް ވަނީ ރަނގަޅު ފުރުސަތުތަކެއް ލިބިގެން ގޮސްފައެވެ. މެޗުގެ ދެވަނަ ހާފުގައި އެންމެ ފުރަތަމަ ލަނޑު ޖަހައި ލީޑު ނެގީ ކޮލަމްބިއާއިންނެވެ. މި ހާފު ފަށައިގެން އަށްވަނަ މިނެޓުގައި މި ލަނޑު އެ ޓީމަށް ކާމިޔާބުކޮށްދިނީ ލިންޑާ ކައިސޭޑޯއެވެ.
އޭގެ ފަހުން މެޗު ނިމެން މިނެޓަކަށް ވެފައި ވަނިކޮށް ލިބުނު ޕެނަލްޓީއަކުން ޖަރުމަނުން ވަނީ ނަތީޖާ އެއްވަރުކޮށްފައެވެ. މި ޕެނަލްޓީ އެ ޓީމަށް ކާމިޔާބުކޮށްދިނީ އަލެކްޒަންޑްރާ ޕޮޕްއެވެ. ނަމަވެސް މެޗުގެ އިތުރު ވަގުތުގެ ހަތްވަނަ މިނެޓުގައި ކޮލަމްބިއާއިން ވަނީ އަލުން ލީޑު ނަގާފައެވެ. މި ލަނޑު އެ ޓީމަށް ޖަހައިދިނީ މަނުއެލާ ވަނޭގަސްއެވެ.
މި މޮޅާއެކު ގްރޫޕް އެޗްގެ އެއްވަނައިގައި ކޮލަމްބިއާ އޮތީ ކުޅުނު ދެ މެޗުންވެސް މޮޅުވެ ހަ ޕޮއިންޓާއެކުއެވެ. އަދި ދެވަނައިގައި އޮތް ޖަރުމަނަށް ލިބިފައިވަނީ ތިން ޕޮއިންޓެވެ. މި ގްރޫޕުގެ ފަހު މެޗުތަކުގައި މޮރޮކޯއާ ދެކޮޅަށް ކޮލަމްބިއާ ނުކުންނައިރު، ޖަރުމަން ނުކުންނާނީ މުބާރާތުން ކަޓާފައިވާ ދެކުނު ކޮރެއާއާ ދެކޮޅަށެވެ.