ނިއު ޒީލަންޑާއި އޮސްޓްރޭލިއާގައި މިހާރު ކުރިއަށްދާ ފީފާ ވިމެންސް ވޯލްޑް ކަޕް 2023 ގައި ދެކުނު ކޮރެއާ މޮޅުވި މެޗުގައި ބުރުގާ އަޅައިގެން ކުޅެ، މޮރޮކޯގެ ނުހައިލާ ބެންޒީނާ ތާރީޚުގެ ތެރެއިން ޖާގަ ހޯދައިފިއެވެ.
އޮސްޓްރޭލިއާގެ ހިންދުމާޝް ސްޓޭޑިއަމުގައި އިއްޔެ ކުޅުނު މެޗު މޮރޮކޯއިން ކާމިޔާބުކުރީ 1-0 ގެ ނަތީޖާއަކުންނެވެ.
މި މެޗުގައި މޮރޮކޯއަށް ކުޅުނު ބެންޒީނާ އަކީ ބުރުގާ އަޅައިގެން ވޯލްޑް ކަޕުގެ މެޗެއްގައި ކުޅުނު ފުރަތަމަ ކުޅުންތެރިޔާއެވެ. މީގެ ކުރިން ބުރުގާ އަޅައިގެން ކުޅުން ފީފާއިން މަނާކުރި ނަމަވެސް، އެ ގަވާއިދު ބަދަލުކޮށް ބުރުގާ އަޅައިގެން ކުޅުމުގެ ހުއްދަ ދިނީ 2014 ވަނަ އަހަރެވެ.
ވޯލްޑް ކަޕުގެ މެޗެއްގައި ބުރުގާ އަޅައިގެން ކުޅުނު ފުރަތަމަ ކުޅުންތެރިޔާގެ ޝަރަފު ހޯދި އުމުރުން 25 އަހަރުގެ ބެންޒީނާ އަކީ މޮރޮކޯގައި ކްލަބު ފުޓްބޯޅަ ކުޅޭ ކުޅުންތެރިއެކެވެ. މެޗަށްފަހު ވާހަކަދައްކަމުން ބެންޒީނާ ބުނީ މިއީ އޭނާއަށް ވަރަށް ފަހުރުވެރި ވަގުތުކޮޅެއް ކަމަށެވެ.
އިއްޔެ ކުޅުނު މެޗުގައި ފެނިގެންދިޔަ ހަމައެކަނި ލަނޑު މޮރޮކޯއިން ކާމިޔާބުކޮށްފައިވަނީ މެޗު ފަށައިގެން ހަވަނަ މިނެޓުގައެވެ. މި ލަނޑު އެ ޓީމަށް ޖަހައިދިނީ އިބްރިސާމް ޖުރައިދީއެވެ.
މި ނަތީޖާއާއެކު މޮރޮކޯއިން މި ފަހަރުގެ މުބާރާތުގައި ފުރަތަމަ މޮޅު ހޯދިއިރު، އެ ޓީމު އޮތީ ގްރޫޕް އެޗްގެ ތިންވަނައިގައި ތިން ޕޮއިންޓާއެކުއެވެ. އަދި މެޗުން ބަލިވި ދެކުނު ކޮރެއާ އޮތީ ފުލުގައި ދެ މެޗުންވެސް ޕޮއިންޓެއް ނުލިބިއެވެ.