ނިއު ޒީލަންޑާއި އޮސްޓްރޭލިއާގައި މިހާރު ކުރިއަށްދާ ފީފާ ވިމެންސް ވޯލްޑް ކަޕް 2023 ގައި ބްރެޒިލް ބަލިކޮށް ފްރާންސުން މުހިންމު މޮޅެއް ހޯދައިފިއެވެ.
އޮސްޓްރޭލިއާގެ ބްރިސްބޭން ސްޓޭޑިއަމުގައި ކުޅުނު މެޗު ފްރާންސުން ކާމިޔާބުކުރީ 2-1 ގެ ނަތީޖާއަކުންނެވެ.
މި މެޗުގައި އެންމެ ފުރަތަމަ ލަނޑު ޖަހައި ލީޑު ނެގީ ފްރާންސުންނެވެ. މެޗުގެ 17 ވަނަ މިނެޓުގައި މި ލަނޑު އެ ޓީމަށް ކާމިޔާބުކޮށްދިނީ ކްލައުޑީން ލެ ސޮމޭއެވެ. އެކަމަކު ދެވަނަ ހާފުގެ ކުރީކޮޅު ބްރެޒިލުން ވަނީ ލަނޑެއް ޖަހައި ނަތީޖާ އެއްވަރުކޮށްފައެވެ. މި ލަނޑު އެ ޓީމަށް ޖަހައިދިނީ ޑެބޯރާ ކްރިސްޓީން ޑި އޮލިވޭރާއެވެ. މި މެޗުން ފްރާންސް މޮޅުވީ މެޗު ނިމެން ހަތް މިނެޓަށް ވެފައި ވަނިކޮށް ވެންޑީ ރެނާޑް ކާމިޔާބުކޮށްދިން ލަނޑުންނެވެ.
މި މޮޅާއެކު ފްރާންސްގެ ކޯޗު ހާވޭ ރެނާޑް ވެފައިވަނީ ފިރިހެން އަދި އަންހެން ވޯލްޑް ކަޕުގައި މެޗެއް ކާމިޔާބުކުރި ފުރަތަމަ ކޯޗަށެވެ. އެގޮތުން މިދިޔަ އަހަރުގެ ފިރިހެނުންގެ ވޯލްޑް ކަޕުގައި ސައުދީ އަރަބިއްޔާއަށް އިރުޝާދުދިން ރެނާޑް ވަނީ ފުރަތަމަ މެޗުގައި ވަރުގަދަ އާޖެންޓީނާ ބަލިކޮށްފައެވެ.
މި ނަތީޖާއާއެކު ގްރޫޕް އެފްގެ އެފްގެ އެއްވަނައިގައި އޮތް ފްރާންސާއި ދެވަނައިގައި އޮތް ޖެމެއިކާއަށް ވަނީ ދެ މެޗުން ހަތަރު ޕޮއިންޓް ލިބިފައެވެ. މި މުބާރާތުގައި އިއްޔެ ކުޅުނު މެޗުން ޖެމެއިކާ ވަނީ ޕެނަމާ އަތުން 1-0 ގެ ނަތީޖާއަކުން މޮޅުވެފައެވެ.