ނިއު ޒީލަންޑާއި އޮސްޓްރޭލިއާގައި މިހާރު ކުރިއަށްދާ ފީފާ ވިމެންސް ވޯލްޑް ކަޕް 2023 ގެ ދެވަނަ ބުރުން ސްވިޑެން ޖާގަ ހޯދައިފިއެވެ.
ސްވިޑެން ދެވަނަ ބުރުގެ ޖާގައެއް ހޯދީ ގުރޫޕް ޖީގައި އިޓަލީ އަތުން ފަސޭހަކަމާއެކު 5-0 ގެ ނަތީޖާއަކުން މޮޅުވެގެންނެވެ.
ނިއު ޒީލަންޑްގެ ވެލިންޓަން ރީޖަނަލް ސްޓޭޑިއަމުގައި އިއްޔެ ކުޅުނު މެޗުގައި އިޓަލީން ގިނައިރު ބޯޅަ ގެންގުޅުނު ނަމަވެސް، ގިނަ ހަމަލާ އުފައްދާފަވަނީ ސްވިޑެންއިންނެވެ. އެންމެފަހުން ކުޅުނު ވޯލްޑް ކަޕުގެ ސެމީ ފައިނަލުގައި ވާދަކުރި ސްވިޑެންއިން މި މެޗުގައި ލީޑު ނެގީ 39 ވަނަ މިނިޓުގައި އަމަންޑާ އިލެސްޓެޑް ކާމިޔާބުކޮށްދިން ލަނޑުންނެވެ.
އަދި މެޗުގެ ފުރަތަމަ ހާފުގެ ފަހު ހަތް މިނެޓުގެ ތެރޭގައި ސްވިޑެންއިން ވަނީ އިތުރު ދެ ލަނޑު ޖަހައި ލީޑު އިތުރަށް ފުޅާކޮށްފައެވެ. މި ލަނޑުތައް އެ ޓީމަށް ކާމިޔާބުކޮށްދިނީ ފްރައިޑޯލީނާ ރޮލްފޯ އާއި ސްޓިނާ ބްލެކްސްޓީނިއަސްއެވެ. މި މެޗުގައި ސްވިޑެންގެ ހަތަރުވަނަ ލަނޑު އެ ޓީމަށް ކާމިޔާބުކޮށްދީ އިލެސްޓެޑެވެ. މިއީ އޭނާ މި މުބާރާތުގައި ކާމިޔާބުކުރި ތިންވަނަ ލަނޑެވެ. މި ތިން ލަނޑުވެސް އޭނާ ކާމިޔާބުކޮށްފަވަނީ ކޯނަރުތަކުން ބޮލުން ޖަހައިގެންނެވެ.
މި މެޗުގައި ސްވިޑެންގެ ފަހު ލަނޑު އިތުރު ވަގުތުގެ ފަހު މިނެޓުގައި ކާމިޔާބުކޮށްދިނީ ރެބެކާ ބްލޮންވިސްޓެވެ.
މި މޮޅާއެކު ސްވިޑެން ދެވަނަ ބުރުން ޖާގަ ހޯދީ ކުޅުނު ދެ މެޗުން ހަ ޕޮއިންޓް ހޯދައިންގެންނެވެ. އިޓަލީން ވަނީ މި މެޗާ ހަމައަށް ވޯލްޑް ކަޕުގައި އެންމެ ފަހުން ކުޅުނު 13 މެޗުގެ ތެރެއިން ހަ މެޗުގައި ބައިކޮޅަށް ލަނޑެއް ވައްދަނުލާ މެޗު ނިންމާލާފައެވެ. މި ނަތީޖާއާއެކު ގްރޫޕް ސްޓޭޖް ފަހު މެޗުގައި ދެކުނު އެފްރިކާ އަތުން އިޓަލީއަށް މޮޅުވުން މަޖުބޫރެވެ.