ރާއްޖޭގެ ގިނަ ކުލަބުތަކަކަށް ކުޅެފައިވާ ޖަޕާނުގެ މިޑްފީލްޑަރު އެއިސޫކޭ މޯރީ، ކުލަބު އީގަލްސްއާ ގުޅިއްޖެއެވެ.
އުމުރުން 29 އަހަރުގެ މޯރީ ވަނީ ދާދި ފަހުން އިންޑިއާގެ އައި ލީގުގެ ކުލަބެއް ކަމަށްވާ އައިޒޯލް އެފްސީއަށް ކުޅެފައެވެ. އެ ޓީމަށް އޭނާ ވަނީ ޖުމްލަ 16 މެޗު ކުޅެދީފައެވެ.
މޯރީ އެންމެ ފުރަތަމަ ރާއްޖޭގެ ކުލަބަކަށް ކުޅެފައިވަނީ 2018 ވަނަ އަހަރު ޖޭޖޭ ސްޕޯޓްސް ކުލަބަށެވެ. އޭގެ ފަހުން 2020 ވަނަ އަހަރުގެ ފުރަތަމަ ޑިވިޝަނުގައި އެ ފަހަރު އަލަށް ވާދަކުރި ސުޕަ ޔުނައިޓެޑް ސްޕޯޓްސް (ސަސް) އަށް ވަނީ ކުޅެފައެވެ. އަދި އޭގެ ފަހުން ޔުނައިޓެޑް ވިކްޓަރީ (ޔޫވީ) އަށްވެސް މޯރީ ކުޅުނުއިރު، އެ ޓީމުގައި އޭނާ ވަނީ މޮޅު ކުޅުމެއް ދައްކާފައެވެ.
މޯރީއަށް މަރުހަބާ ކިޔައި އީގަލްސްއިން ބުނީ މޯރީ އަކީ ޔޫވީ އާއި ސަސްއަށް ކުޅެފައިވާ ކުޅުންތެރިއެއް ކަމަށްވާތީ، އޭނާ އަކީ ދިވެހި ފުޓްބޯޅައަށް އައު ކުޅުންތެރިއެއް ނޫން ކަމަށެވެ.
މެދުކެނޑުމަކަށްފަހު މޯރީ އަލުން ރާއްޖޭގެ ކުލަބަކާ ގުޅުނުއިރު، އޭނާ ވަނީ ރޭ އެމްޑަބްލިއުއެސްސީ ދިވެހި ޕްރިމިއަރ ލީގުގައި ކުލަބު ގްރީން ސްޓްރީޓްސް އަތުން 6-1 ގެ ތަފާތު ބޮޑު ނަތީޖާއަކުން އީގަލްސް މޮޅުވި މެޗުގައި ކުޅެފައެވެ. އެ މެޗުގައި އޭނާ ކުޅެން އަރާފައިވަނީ މެޗުގެ 70 ވަނަ މިނެޓުގައެވެ.
އީގަލްސްއިން އެ ޓީމުގެ ސްކޮޑް ވަރުގަދަ ކުރަމުން އަންނައިރު، މޯރީއާއެކު އީގަލްސްގައި މި ވަގުތު ބިދޭސީ ތިން ކުޅުންތެރިން އެބަތިއްބެވެ.